Այո, ուզում ենք, որ շոու բիզնեսը հարկվի, նրանք էլ դեմ չեն. Դավիթ Անանյան

Թաթան բոլորինն է, համազգային է, բայց նա, մնացածների համեմատ, արտոնյալ չէ` հարկեր վճարել-չվճարելու առումով. կառավարության նիստից հետո լրագրողների հետ զրույցում հայտարարեց ՊԵԿ նախագահ Դավիթ Անանյանը` անդրադառնալով ՊԵԿ հայտարարությանը, որ շոու բիզնեսի ներկաայցուցիչները պետք է հայտարարագրեն եկամուտները և վճարեն հարկեր, նաև` խոսակցություններին, որ ինքն ասել է, որ երգիչ Թաթային «ձեռք չտան»:

Անանյանը տեղեկացրեց, որ ընթացիկ հսկողական գործառույթներ իրականացնում են ՊԵԿ աշխատակիցները, այդ թվում այցելում են ռեստորանային համալիրներ և հորդորում, որ եթե լինում են հավաքույթներ, սահմանված կարգով ձևակերպեն այդ անձանց աշխատանքը: Միևնույն ժամանակ, նա նշեց, որ դա հորդորի տեսքով է լինում:

«Այո, մենք ուզում ենք, որ շոու բիզնեսը հարկվի, բայց նաև շոու բիզնեսից ենք այդպիսի ազդակներ ստանում. նրանք էլ դեմ չեն, որ հարկվեն: Պետք է մոտակա ժամանակներում որոշակի քննարկումներ ունենանք և նրանց ուղղորդենք այն ճիշտ ճանապարհով, որ նրանք դեռ պետք է իրականացնեին տարիներ առաջ, բայց հանրային քննարկման և հանրային փոխադարձ համաձայնություն պետք է ձեռք բերենք և ոչ միայն շոու բիզնեսի առումով: Մենք մատնանշել  ենք շոու բիզնեսին, որպեսզի հարկեր վճարելու մշակույթ կերտելու առումով մշակույթի գործիչները օգնության գան մեզ»,- ասաց Անանյանը:

«Իսկ ինչ-որ մեկն արդեն հայտարարագրե՞լ է եկամուտները» հարցին նա արձագանքեց. «Ճիշտն ասած` այս պահին ունեմ 10 օր առաջվա տեղեկատվություն, որ դեռևս անձնավորված ամփոփ արդյունքներ չեն ներկայացվել, բայց եթե չեմ սխալվում մարտի 15-ն է եկամտային հարկի ամփոփ տարեկան հաշվարկ ներկայացնելու վերջնաժամկետը: Այնպես որ` մարդիկ դեռ ժամանակ ունեն»: