Ովքեր են ԱԺ մշտական հանձնաժողովների նախագահների թեկնածուները

Արդեն տեղեկացրել ենք, որ ԱԺ-ն կունենա 11 մշտական հանձնաժողովներ, որոնցից 8-ի նախագահներին, ըստ Դոնթի բանաձևի, առաջադրելու իրավունք ունի «Իմ քայլը» խմբակցությունը, 2-ին՝ ԲՀԿ-ն և 1-ին՝ ԼՀԿ-ն:

«Մենք քաղաքական կոնսուլտացիաներ ենք կատարել խորհրդարանական ուժերի հետ և ունենք համաձայնություն, թե հատկապես որ հանձնաժողովում որ խմբակցությունն է առաջադրում նախագահի թեկնածուին»,- ԱԺ նիստում հայտարարեց Արարատ Միրզոյանը:

ԱԺ «Իմ քայլը» խմբակցության ղեկավար Լիլիթ Մակունցը հրապարակեց մշտական հանձնաժողովների նախագահների` իրենց թեկնածուների անունները`

Նարեկ Զեյնալյան՝ առողջապահության և սոցիալական հարցերի մշտական հանձնաժողով,

Ռուբեն Ռուբինյան՝ արտաքին հարաբերությունների մշտական հանձնաժողով,

Մխիթար Հայրապետյան՝ գիտության, կրթության, մշակույթի, երիտասարդության և սպորտի հարցերի մշտական հանձնաժողով, 

Արման Եղոյան՝ եվրոպական ինտեգրման հարցերի մշտական հանձնաժողով, 

Անդրանիկ Քոչարյան՝  պաշտպանության և անվտանգության հարցերի մշտական հանձնաժողով, 

Վլադիմիր Վարդանյան՝ պետական-իրավական հարցերի մշտական հանձնաժողով,

Վարազդատ Կարապետյան՝ տարածքային կառավարման, գյուղատնտեսության, շրջակա միջավայրի և կայուն զարգացման հարցերի մշտական հանձնաժողով 

Բաբկեն Թունյան՝ տնտեսական հարցերի մշտական հանձնաժողով:

ԲՀԿ-ական  պատգամավոր Սերգեյ Բագրատյանը հրապարակեց իրենց թեկնածուների անունները՝

Նաիրա Զոհրաբյան՝ մարդու իրավունքների և հանրային հարցերի մշտական հանձնաժողով,

Միքայել Մելքումյան՝ տարածաշրջանային և եվրասիական ինտեգրման հարցերի մշտական հանձնաժողով:

ԼՀԿ խմբակցությունից Էդմոն Մարուքյանը հայտարարեց, որ ֆինանսավարկային և բյուջետային հարցերի մշտական հանձնաժողովի նախագահի պաշտոնում առաջադրում են Մանե Թանդիլյանի թեկնածությունը: