Թուրքիան «The Economist»-ի ժողովրդավարության ինդեքսում նահանջել է 10 հորիզոնականով

Բրիտանական հեղինակավոր «The Economist» պարբերականը հրապարակել է 2018-ի ժողովրդավարության ինդեքսը: Ինդեքսը ցույց է տվել, որ նախորդ տարվա ընթացքում ժողովրդավարությունն ամենաշատ հետընթացն ապրել է Եվրոպայում:

«Ժողովրդավարության ինդեքս 2018. ե՞ս էլ» վերնագրով զեկույցը քննության է առել ժողովրդավարության վիճակը 167 երկրում:

Խնդրո առարկա բնագավառում ամենաշատ հետընթաց գրանցած երկրների ցուցակում է հայտնվել Թուրքիան, որը միանգամից 10 հորիզոնականով նահանջել է և 100-րդ տեղից հանգրվանել 110-րդում:  

Ըստ Ermenihaber-ի` Թուրքիային վերաբերող հատվածում շեշտվել է, որ 2018-ին այդ երկրում տեղի ունեցած համապետական ընտրություններն անցել են արտակարգ դրության պայմաններում և մեծ մասամբ անարդար եղել:

Եվրոպայում Թուրքիային ժողովրդավարության անկման տեմպով հաջորդում է Ռուսաստանը: Այս երկիրը կորցրել է 9 հորիզոնական:

Ըստ առկա ցուցանիշների՝ ամենաժողովրդավարական երկիրը Նորվեգիան է: