Փոխարժեքներ
22 10 2024
|
||
---|---|---|
USD | ⚊ | $ 387.16 |
EUR | ⚊ | € 419.99 |
RUB | ⚊ | ₽ 4.03 |
GBP | ⚊ | £ 504.2 |
GEL | ⚊ | ₾ 142.18 |
Ընտրախախտումների մասին լուրջ ահազանգեր չեն ստացել: «Դրանց մասին կարդացել եմ մամուլից, իմ ռեյտինգային շտաբը որևէ ահազանգ չի ստացել»,- լրագրողների հետ զրույցում ասաց ԱԺ արտահերթ խորհրդարանական ընտրություններում ՀՅԴ ցուցակում երրորդ հորիզոնականը զբաղեցնող Արթուր Խաչատրյանը: Նա ընտրության էր եկել որդու` Արեգի հետ:
Խաչատրյանը հայտնեց, որ ընտրարշավն անցել է բավական բարձր էմոցիոնալ ֆոնով: «Ցավոք, մասնավորապես, կիբերտարածությունում, սոցիալական ցանցերում բավականին տհաճ մթնոլորտ էր տիրում: Ինչ-որ հրապարակում ես անում, բազմաթիվ ֆեյքային հայհոյանքներ են տեղադրվում դրա տակ: Նայում ես` ով է այդ մարդը, որ նման բան է գրել, ինչ-որ ժպիտներ են, աղջիկներ են, փիսիկներ են, բայց փիսիկներին անհարիր բառապաշար է օգտագործված»,- ասաց Խաչատրյանը` չցանկանալով կռահել, թե այդ ֆեյքերի հետևում ովքեր են թաքնված:
Անդրադառնալով ընտրություններին մասնակցողների թվին` նա նշեց, որ ընտրության գալուց առաջ տեսել է ԿԸՀ-ի ասուլիսը, թե 18:00-ի դրությամբ ընտրության է մասնակցել ընտրողների մոտ 40 տոկոսը: Նրա խոսքով` մասնակցության ցածր ցուցանիշը հաճելի չէ, ցանկալի կլիներ, որ մասնակցությունը բարձր լիներ:
Անդրադառնալով ՀՅԴ-ի և իր` ԱԺ մտնելու հնարավորություններին` Խաչատրյանն ասաց, որ լիահույս է` թե՛ ՀՅԴ-ն և՛ թե ինքը կընտրվեն: «Իմ ընտրատարածքում բավականին լուրջ մրցակցություն է` Տիգրան Ավինյան, Վիգեն Սարգսյան, Լիլիթ Մակունց…Բավականին լուրջ ընտրապայքար էր, բայց լիահույս եմ, որ թե' կուսակցությունը, թե' ես բավականաչափ ձայներ կհավաքենք»,-նշեց նա:
Խաչատրյանի խոսքով` ընտրություններին քիչ մասնակցությունը նշանակում է, որ ընտրությանը չմասնակցողները կա'մ հիասթափված են, կա'մ չկողնորոշված: «Իհարկե, կան նաև օբյեկտիվ պատճառներ, բայց ամեն դեպքում փոքր մասնակցությունը լավ չէ: Հայաստանում էական փոփոխություններ տեղի ունեցան ապրիլ-մայիս ամիսներին, և ես հույս ունեի, որ մասնակցությունը մեծ կլինի»,- ասաց նա:
Դաշնակցական թեկնածուի խոսքով` քարոզարշավի ընթացքում մարդիկ փորձում էին սպիտակից ավելի ճերմակ երևալ, սև խոռոչի սև գույնն էին ստացնալ` այսպիսով, մթագնելով մյուս ուժերին, որպեսզի նրանք չկարողանան իրենց ծրագրերը ներկայացնել: «Կարծում եմ` դա էլ ազդեց, որ ընտրողների 50 տոկոսը չներկայացավ»,- ասաց նա` հավելելով, որ եթե ընտրությունները կայանային ավելի ուշ, կուսակցություններն իրենց ծրագրերն ավելի հանգամանալից ներկայացնելու ավելի լավ առիթներ կունենային, հանդիպումները կլինեին ավելի շատ: Որպես օրինակ` Արթուր Խաչատրյանը հիշեցրեց Արաբկիրում իր մասնակցությամբ միջոցառման մասին, որը եղանակային անբարենպաստ պայմանների պատճառով ստիպված էին հետաձգել:
Հարցին` իսկապե՞ս այս ընտրություններն առաջին անգամ է, որ կկայանան ժողովրդավար պայմաններում, ինչպես Նիկոլ Փաշինյանն է ասում, Խաչատրյանը պատասխանեց. «Գիտեք` 1991 թվականի նախագահական ընտրություններում, ճիշտ է, մեր թեկնածուն չանցավ, բայց ժողովրդավար էին: Էլի բարձր էմոցիոնալ ֆոնի վրա էին, բայց ժողովրդավար ընտրություններ էին: Այս ընտրությունների ունիկալության գնահատականի հետ ես երևի համաձայն չլինեմ: Որևէ մեկը 1991-ի ընտրությունների արդյունքները չի բողոքարկել, այդ թեկնածուն էլ ունեցել էր շատ բարձր հեղինակություն: Թե ի՞նչ եղավ դրանից հետո, ես դրա մասին չեմ ցանկանում խոսել»:
Հարցին, թե բավական ձայներ չհավաքելու դեպքում ինչո՞վ է զբաղվելու, դաշնակցական թեկնածուն ասաց. «Կապրենք, կտեսնենք»: Հետո կատակեց. «Արթուր Խաչատրյանը լավ կրթություն է ստացել, բավականին հարուստ աշխատանքային փորձ ունի, այնպես որ… Հույս ունեմ` սոված չեմ մնա»:
Խաչատրյանը նաև անդրադարձավ նախատեսված ժամանակից շուտ իրենց քարոզարշավը սկսած ուժերին: Դիտարկմանը, թե ՀՀԿ-ականների՞ն նկատի ունի, նա պատասխանեց. «Նախկին հանրապետականների` ներկայիս ՔՊ-ականների, որոնք ժամանակին հանրապետական են եղել, մինչև այդ` ՀՀՇ-ական, մինչև այդ էլ` կոմունիստ»:
Yerkir.am-ի հարցին, թե հանուն ինչի՞ է քվեարկել Արթուր Խաչատրյանը, նա պատասխանեց. «Հանուն այս երեխաների, հանուն հողի, հանուն հայի, հանուն հզոր Հայաստանի, հանուն սոցիալապես արդար Հայաստանի: Իսկ Հայաստան ասելով` Հայաստան, Արցախ, հետագայում նաև` Միացյալ Հայաստան»: