ՀՀ նախագահը հյուրընկալել է ՏՏ ոլորտում համաշխարհային ներդրման համար ՀՀ 2018թ. պետական մրցանակակիր Ջեյմս Թրուշարդին

Հանրապետության նախագահ Արմեն Սարգսյանը հյուրընկալել է Տեղեկատվական տեխնոլոգիաների (ՏՏ) ոլորտում համաշխարհային ներդրման համար Հայաստանի Հանրապետության 2018 թվականի պետական մրցանակի արժանացած «Նեշընլ Ինսթրումենթս» ընկերության համահիմնադիր և նախագահ Ջեյմս Թրուշարդին։

Այս մասին տեղեկացնում են Հայաստանի Հանրապետության նախագահի աշխատակազմի հասարակայնության և տեղեկատվության միջոցների հետ կապերի վարչությունից։

«Հայաստանը հանդիսանում է աշխարհի առաջատար երկրներից մեկը, որտեղ մենք կարող ենք զարգացնել նոր գաղափարներ, նոր տեխնոլոգիաներ և լինել 21-րդ դարի գլոբալ զարգացման մասը»,-նշել է հանրապետության նախագահը:

Նա ասել է, որ այսօր նույնիսկ մեծ ընկերությունները գնում են դեպի նոր ստարտափեր, որտեղ ազատություն է տրվում երիտասարդների նորարարական ներուժին, թարմ ու համարձակ գաղափարներին՝ օգտագործելով զարգացման նոր մոդել և նրանց տալով հորիզոնական գործելու, նորարարություններ կատարելու հնարավորություն:

Ջեյմս Թրուշարդը նշել է, որ Հայաստանն ունի մեծ ներուժ բարձր տեխնոլոգիաների բնագավառում, որտեղ կարող են լինել արտահանման իրական հնարավորություններ: