Թուրքիայի, Ամերիկայի քաղաքականությո՞ւնն են վարում «Սասնա ծռերը», ուզում են թուլացնե՞լ կարևոր ուղղությունը. գեներալը՝ ռուսական ռազմաբազայի մասին

Թուրքիան Վրաստանի տարածքով երկաթգիծ է անցկացնում՝ շրջանցելով Հայաստանը, և լրացուցիչ շրջափակում ստեղծում այդ երկրի համար։ Ընդ որում՝ երկաթգիծը գնում է Ադրբեջան։ Այսինքն` այս երկաթուղով կարելի է մեծ քանակությամբ զինուժ տեղափոխել։ Այսօր Երևանում անցկացվող «Լազարյան» ակումբի նիստում ելույթ ունենալիս ասաց ՌԴ ցամաքային զորքերի գլխավոր շտաբի նախկին պետի տեղակալ, Աֆղանստանի պատերազմի մասնակից և ՀՀ ԶՈՒ նախկին հրամանատար, գեներալ-լեյտենանտ Նորատ Տեր–Գրիգորյանցը:

«Եվ հանկարծ այստեղ` Կովկասում, Ադրբեջանի տարածքում, Իրանի կողքին հայտնվում է Իսրայելը, որը յուրացնում է բոլոր օդանավակայանները, ողջ տարածքը և յուրովի վերակազմակերպում այս տարածաշրջանը»,– ասաց բարձրաստիճան զինվորականը` հիշեցնելով, որ Իրանը ոսկոր է Իսրայելի կոկորդում, Իսրայելը` արաբական աշխարհի, իսկ Հայաստանը` թուրք–ադրբեջանական միավորման։

Այս համատեքստում գեներալը հիշեցրեց, որ ժամանակին  Ադրբեջանը նպատակ է ունեցել գրավել Ղարաբաղը, Զանգեզուրը և վերջինս միացնել Նախիջևանին ու  այնտեղից հարձակվել Երևանի վրա: «Այս նպատակը քանդվել է ՀՀ ԶՈՒ-ի ստեղծման ճանապարհով, ինչպես նաև ռուսական կողմից տեխնիկական աջակցության կամ զինման շնորհիվ: Բայց, առանց Ռուսաստանի անմիջական մասնակցության, միայն Հայաստանն է իր կարողություններով դա արել՝ նախկին 7-րդ դաշտային զորամիավորման  ռազմական տեխնիկայի  առկայությամբ, որը Հայաստանի տարածքում էր տեղակայված»,- շեշտեց Նորատ Տեր-Գրիգորյանցը:

Գեներալը կարևորեց Հայաստանի տարածքում ռուսական ռազմաբազայի ու սահմանապահ զորքերի ներկայությունը՝ վտանգավոր համարելով «Սասնա ծռերի» պնդումները: «Ո՞ւմ քաղաքականությունն է իրականացնում՝ Թուրքիայի՞, Ամերիկայի՞: Ինչո՞ւ են նրանք այս գործով զբաղվում, որ թուլացնե՞ն այդ ուղղությունը: Մենք պետք է այդ բարեկամության ամրացման ուղղությամբ շարժվենք և թույլ չտանք հրդեհ Կովկասում»,- ընդգծեց նա: