Կրեմլը ուշադրություն դարձրել է Թրամփի հայտարարությանը. Պեսկով

Կրեմլը ուշադրություն դարձրել է ԱՄՆ նախագահ Դոնալդ Թրամփի` ՌԴ նախագահ Վլադիմիր Պուտինի հետ հանդիպումը չեղարկելու մասին հայտարարությանը: Այդ մասին ասել է ՌԴ նախագահի մամուլի խոսնակ Դմիտրի Պեսկովը. հայտնում է РИА Новости-ն:

Նա նշել է, որ, չնայած դրան, ավելի վաղ Սպիտակ տունը հայտնել է, որ հանդիպումը կկայանա:

ԱՄՆ նախագահ Դոնալդ Թրամփը  հայտարարել է, որ հնարավոր է չեղարկի Արգենտինայում Պուտինի հետ կայանալիք հանդիպումը` Կերչի նեղուցում ստեղծված իրավիճակի հետ կապված: «Ինձ դուր չի գալիս այդ ագրեսիան: Ես ընդհանրապես չեմ ցանկանում ագրեսիա»,- ասել է նա:

ԱՄՆ նախագահը հավելել է, որ  ակնկալում է մոտ օրերս հատուկ ծառայություններից միջադեպի մասին ամբողջական հաշվետվություն ստանալ:

Կիրակի ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են: