Կերչի ճգնաժամից շահում են Ռուսաստանի և Ուկրաինայի նախագահները. Վենեդիկտով

Կերչի ճգնաժամից  քաղաքական առումով շահում են Ռուսաստանի և Ուկրաինայի նախագահները: Նման կարծիք է հայտնել «Эхо Москвы» ռադիոկայանի գլխավոր խմբագիր Ալեքսեյ Վենեդիկտովը:

Նա նշում է, որ «Վլադիմիր Պուտինը, ընկնող վարկանիշի ֆոնին, պետք է միավորի ժողովրդին «արևմտյան զավթիչների» կողմից աջակցություն ստացող «ագրեսոր» հարևանի վտանգի շուրջ, ինչը եղավ Էստոնիայի և Վրաստանի հետ կոնֆլիկտի ժամանակ»:

Իսկ Պորոշենկոն, ըստ Վենեդիկտովի,  ռազմական դրություն է հայտարարում նախագահական ընտրությունները չեղարկելու համար, քանի որ կարող է անգամ երկրորդ փուլ չանցնել:

Կիրակի ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են:

ՌԴ-ն քրեական գործ է հարուցել և ՄԱԿ-ի Անվտանգության խորհրդի շտապ նիստ հրավիրել Ազովի ծովում ստեղծված իրավիճակի հետ կապված: