Ռուսաստանը պետք է Ուկրաինային վերադարձնի նավերը. Տուսկ

Ռուսաստանը պետք է  Ուկրաինային վերադարձնի նավերը և նավաստիներին, որոնք ձերբակալվել են ՌԴ-ի սահմանը հատելու համար: Այդ մասին հայտարարել է Եվրոպական խորհրդի նախագահ Դոնալդ Տուսկը. հայտնում է Интерфакс-ը:

«Ես դատապարտում եմ Ազովի ծովում ՌԴ-ի կողմից ուժի կիրառումը: Ռուսական իշխանությունները պետք է վերադարձնեն ուկրաինացի նավաստիներին և զերծ մնան հետագա սադրանքներից»,- ասել է նա:

Երեկ ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են:

ՌԴ-ն քրեական գործ է հարուցել և ՄԱԿ-ի Անվտանգության խորհրդի շտապ նիստ հրավիրել Ազովի ծովում ստեղծված իրավիճակի հետ կապված: