Հայաստանի և Կիլիկիո կաթողիկոսության հետ մեր հարաբերությունները ռազմավարական կարևորություն ունեն. Լիբանանում Իրանի դեսպանը`Արամ Ա-ին

Մեծի Տանն Կիլիկիո կաթողիկոս Արամ Ա Վեհափառն ընդունել է Լիբանանում Իրանի Իսլամական Հանրապետության նորանշանակ դեսպան Մուհամմեդ Ջալալ Ֆրուզնիին:

Armenianorthodoxchurch կայքից տեղեկանում ենք, որ մոտ երկու ժամ տևած զրույցի ընթացքում լայնորեն քննարկվել են Իրանի և Մեծի Տանն Կիլիկիո կաթողիկոսության ու Հայաստանի միջև գործակցությանը, ինչպես նաև Միջին Արևելքին ու Լիբանանին առնչվող հարցեր:

Նորին Սրբությունը շեշտել է Իրանի ու Հայաստանի միջև գործակցությունն ամրացնելու կարևորությունը` այն համարելով կենսական թե' Հայաստանի և թե' Իրանի համար:

Դեսպանն իր հերթին նշել է, որ Իրանը նույն դրական մոտեցմամբ  շարունակելու իր գործակցությունը և բարեկամական հարաբերությունները Հայաստանի հետ` հավելելով, որ թե' Հայաստանի, թե' Կիլիկիո կաթողիկոսության հետ Իրանի հարաբերությունները ռազմավարական կարևորություն ունեն:

Հանդիպման ընթացքում անդրադարձ է եղել նաև Միջին Արևելքին, հատկապես` Սիրիայի ու Լիբանանի իրավիճակին: Արամ Ա-ն ողջունել է դեպի վերականգնում և վերակազմակերպում ընթացող` Սիրիայի ջանքերը, ինչպես նաև շեշտել Սփյուռքի հայության համար Սիրիայի հայ համայնքի կարևորությունը:

Ինչ վերաբերում է Լիբանանին` Արամ Ա-ն ընդգծել է երկու հայ նախարարներ ունենալու անհրաժեշտությունը` որպես հայ համայնքի իրավունք:

Այս շրջանակներում Իրանի դեսպանը ողջունել է Սիրիայի հայության զորակցությունը սիրիական իշխանությանը և Լիբանանի նոր կառավարության մեջ երկու նախարար ունենալու` հայ համայնքի իրավունքը:

Վեհափառ հայրապետն ու դեսպանն անդրադարձել են նաև Իրանի հայությանը: Դեսպանը մեծ հարգանքով է արտահայտվել Իրանի հայության մասին, մանավանդ`  երկրի հզորացման և ծաղկման աշխատանքներում նրա գործուն մասնակցության մասին:

Հայրապետն իր հերթին խոր գնահատանք է հայտնել Իրանի հայության նկատմամբ երկրի հոգևոր առաջնորդի և պետության ցուցաբերած սիրալիր մոտեցման, ինչպես նաև երկրում հայության վայելած լայն ազատությունների կապակցությամբ: