Իրանի հետ հարաբերությունները կենսական կարևորություն ունեն Հայաստանի համար. Սերժ Սարգսյան

Իրանի  հետ հարաբերությունները կենսական կարևորություն ունեն Հայաստանի համար: «Մեր քաղաքական երկխոսությունը կայուն է, փոխադարձ այցեր են պարբերաբար տեղի ունենում»,- ֆրանսիական L'Express պարբերականին տված հարցազրույցում ասել  է ՀՀ նախագահ Սերժ Սարգսյանը` պատասխանելով հարցին, թե ինչպե՞ս է Հայաստանը զարգացնում հարաբերությունները Իրանի հետ, քանի որ մյուս երկու հարևանների` Թուրքիայի և Ադրբեջանի հետ, խնդիրներ ունի` Հայոց ցեղասպանության ճանաչման հարցը և ԼՂ չկարգավորված հակամարտությունը:

Նախագահն ընդգծել է, որ Թեհրանը մշտապես չեզոք և հավասարակշռված դիրքորոշում է ցուցաբերել Ղարաբաղյան հարցի նկատմամբ: «Թեև Ադրբեջանը զուր ջանքեր է գործադրում Ղարաբաղյան հակամարտությանը կրոնական բնույթ հաղորդելու համար, մեր օրինակելի հարաբերությունները Իրանի հետ ապացուցում են, որ Հայաստանը հարգում է իր հարևաններին և նրանց մշակույթը»,- ասել է Սերժ Սարգսյանը:

Հարցին` արդյո՞ք Հայաստանին չեն մտահոգում հարևան երկրի միջուկային նկրտումները, ՀՀ նախագահը պատասխանել է, որ 2015-ի հուլիսին Իրանի միջուկային ծրագրի վերաբերյալ ստորագրված համաձայնագիրը խաղաղության տանող կառուցողական մոտեցում է, և Ֆրանսիան նույնպես, ինչպես ասել է նախագահ Մակրոնը, աջակցում է դրան: