Բանտախցում խաղադրույք են կատարել, թե նստած տեղից ճանճը որ ուղղությամբ կթռչի. Արտակ Զեյնալյան

ՔՊ կուսակցության պատգամավոր Ալեն Սիմոնյանն ԱԺ-ում կառավարության հետ հարցուպատասխանի ժամանակ նշեց, որ, իր տեղեկություններով, քրեակատարողական հիմնարկներում ազատազրկվածները խաղամոլության պատճառով մի շարք խնդիրներ են ունենում: Նրա խոսքով՝ կալանավորները զանգում են իրենց հարազատներին, ընկերներին ու գումար ուզում, քանի որ խաղում են ու պարտվում: Ալեն Սիմոյնան արդարադատության նախարարի պաշտոնակատար Արտակ Զեյնալյանին խնդրեց ուշադիր լինել և միջոցներ ձեռնարկել:  

Ի պատասխան Զեյնալյանն ասաց, որ ավանդույթը, որ կար ՔԿՀ-ներում` հարկադրել խաղալ կամ տուրք վճարել չխաղալու համար, ամենաբարձր մակարդակով վերացված է: «Սակայն խցերում մոլախաղեր են խաղում, դա վերացնել հնարավոր չէ: Արգելված իրերը՝ խաղաթղթեր և այլն, առգրավվում են, սակայն նկատել ենք նաև, որ եթե ամեն ինչ առգրավում ենք, խաղադրույք են կատարում սպորտային խաղերի վրա: Բացահայտվել է դեպք` խաղադրույք են կատարել, թե նստած տեղից ճանճը որ ուղղությամբ կթռչի, այսինքն՝ եթե մարդը ցանկանում է խաղադրույք կատարել, ամեն ինչի վրա էլ կարող է կատարել: Իհարկե, ամեն ինչ արվում է սրա վերացման համար, և առաջին հերթին փորձում ենք զբաղվածություն մտցնել»,- ասաց Զեյնալյանը: