Ռումբի ահազանգ՝ թիվ 155 դպրոցում

Քիչ առաջ արտակարգ դեպք է տեղի ունեցել Երևանում։ ՀՀ արտակարգ իրավիճակների նախարարության փրկարար ծառայության 911 և ոստիկանության Երևան քաղաքի վարչության օպերատիվ կառավարման կենտրոններ ահազանգ է ստացվել, որ Աջափնյակ վարչական շրջանի Լ. Միրիջանյանի անվան թիվ 155 հիմնական դպրոցում ռումբ է դրած, և այն պայթելու է։

Դպրոցից Yerkir.am-ին տեղեկացրեցին, որ դպրոց են ժամանել հրշեջ-փրկարարներ, ոստիկաններ, ինչպես նաև շտապօգնության խումբը։ «Դպրոցից տարհանվել էին ուսուցիչները և աշակերտները, իսկ ոստիկանները որոնողական աշխատանքներ են կատարել: Սակայն կարճ ժամանակ անց հայտնի դարձավ, որ ահազանգը սուտ է եղել: Դպրոցը վերսկսել է իր աշխատանքները»,- ասացին մեզ՝ հավելելով, որ դեպքը տեղի է ունեցել 7-րդ ժամի ավարտին մոտ, այսինքն՝ այնպես չէ, որ աշակերտներից մեկը կարող է նման ահազանգ կատարած լինել դասերից խուսափելու համար: