«Մեզ այսքան ժամանակ ոչ ոք մարդատեղ չի դրել». Միքայել Մանուկյանը սպայական հանրակացարան էր այցելել (լուսանկարներ)

Նուբարաշենի 6-րդ փողոցի սպայական հանրակացարանում ապրում է 9 ընտանիք: Նրանց է այցելել ՀՅԴ ցուցակով քաղաքապետի թեկնածու Միքայել Մանուկյանը` իր թիմի հետ:

Հանրակացարանի բնակիչներից Անահիտ Սարգսյանը, նախքան խնդիրները պատմելը, շտապեց հայտնել, որ 25 տարի է` այս շենքում են ապրում, բայց դեռ որևէ պաշտոնյա, նույնիսկ թեկնածու իրենց չի այցելել: «Մեզ մարդու տեղ չեն դնում»,- ասաց նա, ապա խոսեց շենքի անմիխիթար վիճակից:

Միքայել Մանուկյանը նշեց, որ անզեն աչքով էլ տեսանելի է շենքի անմխիթար վիճակը:

Հյուրերին բնակիչները հրավիրեցին  ներս` ծանոթանալու իրենց բնակության վայրի պայմաններին:

«Ոչ մի բան չեն անում, գրավոր դիմում ենք, բանավոր պատասխանում են` հովանավոր ճարեք»,- ասաց բնակիչներից Վաչագան Ղուկասյանը և հավելեց. «Առաջին մարդն եք, որ մեզնով հետաքրքրվում է: Մեզ «բոմժ» են ասում»:

Մեկ այլ բնակիչ էլ հավելեց. «Բա այդ տպավորությունն է: Բնակարանները ճիշտ է` քանդվելու եզրին են, բայց տեսաք, թե ինչքան մաքուր է»:

Նրանք նշեցին, որ անձրևի ժամանակ տանը գտնվես, թե` դրսում, նույն բանն է:  

Բնակիչների խնդիրները լսելուց, նրանց բնակարանների վիճակին ծանոթանալուց հետո Մանուկյանը խոստացավ, որ, անկախ նրանից`ընտրություններում ինչ արդյունք կգրանցվի, այդ մարդկանց անպայման օգնելու են: Նա առաջարկեց մարդկանց խնդրի լուծման տարբերակներից մեկը: «Եթե պետությունը, քաղաքապետարանը կամ համայնքը շինարարություն իրականացնող ընկերության հետ պայմանագիր կնքի, գումարը նախապես կամ մաս-մաս վճարի մինչև այն ժամանակ, երբ կառուցապատողն արդեն վաճառքից կկարողանա եկամուտ ստանալ,  և համայնքապետարանի գումարն այլևս պետք չլինի իրեն, այս մարդկանց կտեղավորի բնակարաններում, մնացածներն էլ կվաճառի ու շահույթ կապահովի իրեն»,- ասաց Մանուկյանը: