Որքա՞ն գումար է հայտնաբերվել «Յանս»-ի սեփականատիրոջ բնակարանից ու ռեստորանից

«Յանս» ռեստորանային համալիրի տնօրինության կողմից ֆինանսական ենթադրյալ չարաշահումների վերաբերյալ քննվող քրեական գործի շրջանակներում երեկ խուզարկություն է կատարվել նաև «Յանս» ռեստորանային համալիրի սեփականատիրոջ բնակարանում: Այս տեղեկությունը Yerkir.am-ի հետ զրույցում հաստատեց ՀՀ քննչական կոմիտեի նախագահի խորհրդական Սոնա Տռուզյանը:

Նշենք, որ «Յանս» ռեստորանային համալիրի սեփականատերը Սերժ Սարգսյանի թիկնազորի պետ Վաչագան Ղազարյանի կինն է:

Տռուզյանը տեղեկացրեց, որ «Յանս» ռեստորանում և դրա սեփականատիրոջ բնակարանում կատարված խուզարկությամբ հայտնաբերվել է 1 մլն 100 հազար 400 դոլար, 230.500 եվրո, 36 մլն դրամ: Հայտնաբերված գումարն ի պահ է հանձնվել Կենտրոնական բանկին՝ մինչև քննությամբ պարզվի դրանց ծագումը:

Հիշեցնենք, որ դեպքի առթիվ հարուցվել է քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով, որով նախաքննությունն իրականացվում է ՀՀ ՔԿ Երևան քաղաքի քննչական վարչությունում: