Դպրոցների հետ կապված լուրջ որոշումներ ունենք կայացնելու. ԿԳ նախարար

Կառավարության նիստից հետո լրագրողների հետ ճեպազրույցում ԿԳ նախարար Արայիկ Հարությունյանն անդրադարձավ հարցին, թե արդյո՞ք հրապարակվելու են կրթության ոլորտում կոռուպցիոն սկանդալների մասին տեղեկություններ: Կրթության նախարարը նշեց, որ բոլոր ոլորտներում էլ վիճակը վատ է, բոլոր ոլորտներում ստուգումներ կլինեն, իսկ այս պահին ուսումնասիրություններն ընթանում են միջին մասնագիտական հաստատություններում, դպրոցներում:

«Ուսումնասիրություններ են արվում ոլորտում խախտումների, չարաշահումների կոռուպցիայի հայտնաբերման ուղղությամբ: Առաջիկայում կհրապարակենք արդյունքները, դուք կորոշեք` սկանդալայի՞ն են դրանք, թե՞ ոչ»,- ասաց ԿԳ նախարարը: Ըստ նրա` ԿԳՆ-ն պատժող մարմին չէ, ընդամենը փաստերը կներկայացնեն իրավապահ մարմիններին:

Արայիկ Հարությունյանը վստահ է, որ դպրոցներում խորհուրդների մեծ մասը չեն ծառայում այն նպատակին, որի համար ստեղծվել են, չեն պաշտպանում դպրոցի շահերը: Փոխարենը` որոշ անձանց շահերն են այդտեղ պաշտպանվում: «Կարգը պետք է վերանայվի, դպրոցների հետ կապված լուրջ որոշումներ ունենք կայացնելու առաջիկայում: Մի քանի տարբերակ քննարկվում է»,-ասաց նա:

Ինչ վերաբերում է ԵՊՀ ռեկտորի հրաժարականի պահանջին, ապա, Արայիկ Հարությունյանի խոսքով, այդ հարցում ԿԳՆ-ն անկախ արբիտրի դեր է կատարում` կայացնելով որոշումներ, որոնք կբխեն օրենքից եւ իրավունքից: