Թուրքիայում ընդդիմության թեկնածուն խոստանում է լուծել քրդական հարցը

Թուրքիայի ընդդիմադիր Ժողովրդահանրապետական կուսակցությունից նախագահի թեկնածու առաջադրված Մուհարրեմ Ինջեն խոստացել է լուծել քրդական հարցը: Ըստ DHA-ի` նա նշել է, որ այդ հարցի լուծման համար ունի իր ծրագիրը։

Ինջեն հայատարարել է, որ հարցն այս պահի դրությամբ մտել է փակուղի, քանի որ ահաբեկչության վտանգը շարունակում է բարձր մնալ։ «Քրդական հարցն ազատության ու ժողովրդավարության հետ կապված խնդիր է, սակայն Թուրքիան իր առաջ չունի որևէ խոչընդոտ այս ներքին հարցը լուծելու համար»,- ասել է նա:

Անդրադառնալով նաև ռուս-թուրքական հարաբերություններին` Ինջեն նշել է, որ իր՝ նախագահի պաշտոնում ընտրվելու դեպքում Մոսկվայի հետ հարաբերություններն ու ձեռք բերված տնտեսական, էներգետիկ ու ռազմական բոլոր համաձայնությունները ոչ միայն կպահպանվեն, այլև  ավելի կզարգանան։