Շարունակելու ենք համագործակցությունը GIZ-ի հետ. Արծվիկ Մինասյան

ՀՀ տնտեսական զարգացման և ներդրումների նախարար Արծվիկ Մինասյանը մայիսի 24-ին ընդունել է Հայաստանում Գերմանիայի միջազգային համագործակցության (ԳՄՀ/GIZ) կազմակերպության ՓՄՁ ծրագրերի աջակցության ղեկավար Էվա Մարիա Նահերին։

Հանդիպմանը մասնակցել են նախարարի տեղակալ Ավագ Ավանեսյանը և նախարարության շահագրգիռ ստորաբաժանումների ղեկավարներ։

Ողջունելով տիկին Նահերին, նախարար Մինասյանը նշել է, որ բարձր է գնահատում GIZ-ի հետ համատեղ ծրագրերի իրականացումը և պատրաստ է լսելու, քննարկումներ կազմակերպելու և անհրաժեշտ աջակցություն ցուցաբերելու հետաքրքիր նախագծերը միասնական ջանքերով կյանքի կոչելու համար։

Էվա Մարիա Նահերը շնորհավորել է Արծվիկ Մինասյանին ՀՀ տնտեսական զարգացման և ներդրումների նախարարի պաշտոնում նշանակվելու կապակցությամբ և նշել, որ իրենց կողմից ներկայումս ակտիվ աշխատանք է իրականացվում ստեղծագործական արդյունաբերության ոլորտի ուղղությամբ, որը դինամիկ, ստեղծագործող երիտասարդներին հնարավորություն է ընձեռում գործունեություն ծավալելու և Հայաստանում հաջողության հասնելու: Տիկին Նահերը նաև հայտնել է, որ իրենց գործունեության արդյունքում Հայաստանում ձևավորվել է նորաձևության և դիզայնի պալատ, և այդ նախաձեռնությունը օժանդակություն է ստացել դրամաշնորհային ծրագրի շրջանակներում:

Հանդիպման ընթացքում խոսվել է նաև Հայստանում ստեղծագործական հաբերի (խմբերի) կայացման անհրաժեշտության մասին, որտեղ կհավաքվեն տարբեր ոլորտների մասնագետներ՝ գաղափարների փոխանակման և բիզնես հնարավորությունների ընդլայնման նպատակով:

Էվա Մարիա Նահերը ներկայացրել է Մեծ Բրիտանիայից ժամանած փորձագետին, ով ունի միջազգային փորձ այս ոլորտում և արդեն իսկ Հայաստանում հանդիպումներ է ունեցել տարբեր ներկայացուցիչների հետ: Փորձագետը տեղեկացրել է, որ լայն գործունեություն է իրականացրել Ռուսաստանում, Բելառուսում և, մասնավորապես, Վրաստանում, նաև նշել, որ առաջիկայում պատրաստ կլինի ներկայացնել Հայաստանում հաբի զարգացման հայեցակարգը:

Հավանություն տալով գործընկերների հետաքրքիր գաղափարին, Արծվիկ Մինասյանը շեշտել է դրա կարևորությունը և պատրաստակամություն հայտնել աջակցել նախաձեռնության իրականացմանը: