Ատոմակայանի աշխատանքները 10 տարով կերկարաձգվեն, բայց այն ավելի երկար կծառայի. նախարար

Ատոմակայանի աշխատանքները 10 տարով կերկարաձգվեն, բայց այն ավելի երկար կծառայի. խորհրդարանում լրագրողների հետ զրույցում ասաց Էներգետիկ ենթակառուցվածքների և բնական պաշարների նախարար Արթուր Գրիգորյանը`  նշելով, որ դա առաջնահերթ խնդիրներից է:

«Ամսի 1-ից կանգնեցնում ենք ատոմակայանը և սկսում ենք շինարարական` գործունեությունը երկարաձգելուն ուղղված աշխատանքները: Մի որոշ ժամանակ հետո կանգնեցվելու է նաև Երևանի ՋԷԿ-ը, դարձյալ վերակառուցման շինարարական աշխատանքներ են սկսվելու»,- ասաց նախարարը:

Նա հայտնեց, թե որ ռեսուրսներով են կոմպենսացվելու էներգիայի աղբյուրները. ամբողջապես շահագործվելու է Հրազդանի 5-րդ բլոկը, նաև` Վրաստանից Հայաստանը հոսանք է ներկրում, հետևաբար` ՀՀ-ն էներգիայով ապահովված կլինի։

Հարցին` վերանորոգումից հետո քանի՞ տարի կծառայի ատոմակայանը,  Գրիգորյանը պատասխանեց. «Ըստ պայմանագրի և փորձագիտական եզրակացությունների՝ 10 տարով ենք երկարաձգելու, բայց ես համոզված եմ, որ ավելին է լինելու»։