Ուզում ենք՝ Փաշինյանը բոլոր խնդիրները լուծի մեկ զանգով, զզվել ենք այդ մեկ զանգերից

Ի՞նչ անելիքներ կան հետհեղափոխական շրջանում և ի՞նչ քայլերով պետք է լուծվեն խնդիրները: Այս թեմաների շուրջ այսօր լրագրողների հետ զրույցում իրենց տեսակետը հայտնեցին մշակույթի ոլորտի ներկայացուցիչները:

Երաժիշտ Եղիշե Պետրոսյանի խոսքով՝   իշխանությունը վերցնելու` առաջին գլխավոր քայլն արված է, սակայն դեռ բավականին աշխատանք կա անելու: Ըստ նրա՝ երկիրն  այնպես են քանդել ու ավերել, որ արագ չեն կարող վերականգնել: «Հուսով եմ, որ քայլեր արդեն իսկ արվում են` եղածը շտկելու համար, այսինքն՝ ես տեսնում եմ, որ դանդաղ, բայց ինչ-ինչ բաներ արվում են, և վստահ եմ՝ ամեն ինչ լավ է լինելու»,- ասաց Պետրոսյանը:

Դրամատուրգ Կարինե Խոդիկյանի կարծքով՝ ամենակարևոր քայլն արտահերթ խորհրդարանական ընտրությունների անցկացումն է: Ըստ նրա` որպեսզի կյանքի կոչվեն այն փոփոխությունները, որոնց մենք սպասում ենք, պետք է արտահերթ ընտրություններ անցկացվեն:

«Երկար ժամանակ ջրամբարում կուտակված ջուրը, որ բաց ես թողնում, ջրհեղեղի վտանգ կա. այնքան խնդիրներ են կուտակվել: Ես համաձայն եմ Շանթ Հարությունյանի այն կոչի հետ, որ ժամանակ տանք կառավարությանը, որպեսզի հասկանանք՝ ինչ են անելու, ինչպես աշխատում: 1-2 շաբաթ, որ Փաշինյանը վարչապետի պաշտոնին է, բայց արդեն ուզում ենք 20 տարիների ընթացքում կուտակված խնդիրները լուծի և այն էլ՝ մեկ զանգով: Մենք զզվել ենք այդ մեկ զանգից: Պետք է սպասել», ասաց Խոդիկյանը:

Նրա խոսքով՝ ինչքան շուտ կազմակերպվի ժողովուրդն, ու ինչքան շուտ հեղափոխական ալիքը փոխարինվի ստեղծագործ ալիքով կամ առօրյա աշխատանքով, այնքան դա ի բարօրիություն մեր երկրի կծառայի: