Փոխադարձ շնորհակալություններ` Վարդան Հարությունյանի ազատման դիմումի քննարկման ժամանակ

Այսօր կառավարության նիստում, ուր քննարկվում էր ՊԵԿ նախագահի պաշտոնից ազատման և նոր նախագահի նշանակման հարցը, փոխադարձ շնորհակալությունների պակաս չզգացվեց: Այսպես` տնտեսական զարգացման և ներդրումների նախագահ Արծվիկ Մինասյանը շնորհակալություն հայտնեց Վարդան Հարությունյանին` համատեղ աշխատանքի և լավ գործունեության համար:

«Լավ կլիներ, որ պարոն Հարությունյանը մի քիչ օպերատիվ տեղեկատվություն տար հարկերի մասով, եթե ունի նման տեղեկատվություն` նկատի ունենալով նրա` օպերատիվ տեղեկություններ ունենալու և բարեփոխումներ իրականացնելու գործառույթը»,- ասաց նա:

Ապա վարչապետ Նիկոլ Փաշինյանը նշեց, որ ցանկանում է Վարդան Հարությունյանին շնորհակալություն հայտնել իր գործունեության համար, և մաղթեց նրան հաջողություններ:

Վարդան Հարությունյանն էլ իր հերթին շնորհակալություն հայտնեց վարչապետին` իր դիմումն ընդունելու և աշխատանքից ազատելու համար: Նա տեղեկացրեց, որ այս տարվա չորս ամիսների հարկային հավաքագրումը 14 միլիարդով գերազանցել է բյուջեի հիմքում դրված մեծությունը: «Նոր կառավարությանը ցանկանում եմ հաջողություններ: Իմ ներուժը միշտ կարող եք օգտագործել ծրագրերը իրականացնելիս»,- ասաց Վարդան Հարությունյանը:

Առաջին փոխվարչապետ Արարատ Միրզոյանը հավելեց, որ նույնպես ցանկանում է շնորհակալություն հայտնել ՊԵԿկ նախկին նախագահ Վարդան Հարությունյանին: Նա նաև նոր ՊԵԿ նախագահի ուշադրությունը հրավիրեց վերջին օրերին մաքսակետերում միջնորդ կազմակերպությունների կողմից իրականացվող ինքնիրավչության, գանձվող գումարների զանազան մեխանիզմների, հարկային տեռորի վրա: