Բաքվում հայտարարել են, որ պատրաստ են ԼՂ հարցով բանակցություններին

Ադրբեջանը պատրաստ է ԼՂ կոնֆլիկտի կարգավորման հարցով բանակցություններին: Այս մասին հաղորդում է «ՌԻԱ Նովոստի»-ն: Բաքուն կոչ է անում Հայաստանի նոր քաղաքական ղեկավարությանը «չկրկնել իր նախորդների սխալները», այս մասին հայտարարել է Ադրբեջանի ԱԳՆ պաշտոնական ներկայացուցիչ Հիքմեդ Հաջիևը:

Երեքշաբթի օրը Հայաստանը ընտրեց նոր վարչապետի` ընդդիմության առաջնորդ Նիկոլ Փաշինյանին: Նախքան ընտրվելը, Փաշինյանը հայտարարել է, որ պատրաստ է բանակցությունների Ադրբեջանի ղեկավարության հետ` ԼՂ կոնֆլիկտի կարգավորման հարցով, բայց պայմանով, որ այդ բանակցություններին կմասնակցի Արցախի Հանրապետությունը:

«Մենք բոլորս հույս ունենք, որ Հայաստանի նոր քաղաքական ղեկավարությունը չի կրկնի իր նախորդների սխալները, այլ կփորձի իրականացնել առողջ քաղաքականություն, կփորձի ստեղծել քաղաքակիրթ հարաբերություններ` հարևան երկրների հետ խաղաղ գոյակցությաննպատակով»,- ասել է Հաջիևը` հավելելով. «Գնդակը գտնվում է հայկական դաշտում, և կարիք չկա հեծանիվ հորինել: Ցանկանում եմ ևս մեկ անգամ ընդգծել, որ Ադրբեջանը լիարժեքորեն պատրաստ է բանակցություններին` ԵԱՀԿ ՄԽ միջնորդությամբ` կոնֆլիկտի արագ կարգավորման նպատակով»: