Թուրքիայի պահանջով Չեխիայում ձերբակալված քուրդ գործիչն ազատ է արձակվել

Փետրվարի 25-ին Թուրքիայի պահանջով Պրահայում կալանավորված` Սիրիայի քրդական Ժողովրդավարական միություն կուսակցության (ԺՄԿ-PYD) նախկին համանախագահ Սալիհ Մուսլիմն ազատ է արձակվել։ Նրա գործով  առաջին դատական լսումը տեղի է ունեցել այսօր՝ փետրվարի 27-ին։

Ըստ Ermenihaber-ի՝ Թուրքիայի արդարադատության նախարարությունը համապատասխան փաստաթղթեր է ուղարկել Չեխիային՝ Մուսլիմի արտահանձման վերաբերյալ, ով Թուրքիայում մեղադրվում է ահաբեկչական կազմակերպության անդամ լինելու, ինչպես նաև ահաբեկչություն իրականացնելու մեջ։

Թուրքիան փետրվարի 13-ին Սալիհ Մուսլիմին ընդգրկել էր հետախուզման մեջ գտնվող  հանցագործների «կարմիր ցուցակում»: Թուրքիայի ղեկավարությունը 4 մլն թուրքական լիրա (մոտ 1 մլն դոլար) էր խոստացել այն կողմին, ով կձերբակալեր քուրդ քաղաքական գործչին և կարտահանձներ իրեն։

Թուրքական աղբյուրն այլ մանրամասներ չի հաղորդում դատարանի որոշման մասին։

Մուսլիմի ազատ արձակմանն արդեն հասցրել է արձագանքել  Չեխիայում Թուրքիայի դեսպանությունը` մտահոգություն է հայտնել տեղի ունեցածի մասին։

Որոշումը մեծ արձագանք է գտել թուրքական մամուլում։