ՏԿԶՆ-ում կայացել է աշխատանքային քննարկում` ՀՀ բանկային համակարգի ներկայացուցիչների մասնակցությամբ

ՀՀ տարածքային կառավարման և զարգացման նախարարի տեղակալ Վարազդատ Կարապետյանն այսօր ՀՀ տարածքային կառավարման և զարգացման նախարարությունում ՀՀ բանկային համակարգի ներկայացուցիչներին է ներկայացրել Համայնքների տնտեսության աճի վրա էական ազդեցություն ունեցող ներդրումային և գործարար ծրագրերի գնահատման նախարարության կողմից մշակված ընթացակարգը։

Վ. Կարապետյանը նշել է, որ hանրապետության տնտեսության կայունության, համաչափ տարածքային զարգացման և հետագա տնտեսական աճի ապահովման համար անհրաժեշտ քայլերից է հանդիսանում արդյունավետ ներդրումային քաղաքականության վարումը և բարենպաստ ներդրումային միջավայրի ստեղծումը՝ աշխուժացնելով ներդրումային գործընթացը։ Այս նպատակով ձևավորված գնահատող հանձնաժողովի դրական եզրակացության առկայության դեպքում Կառավարությունը կսուբսիդավորի վարկային տոկոսադրույքի չափը՝ հնարավորություն ընձեռելով բարձրացնել ընկերությունների մրցակցությունը, զարգացնել տնտեսական ենթակառուցվածքները և նպաստել ազգային ու տեղական կարևորագույն ծրագրերի արդյունավետ իրականացմանը։

Հանդիպման ընթացքում հնչեցվել են  ծրագրի արդյունավետության բարձրացմանն ու ընթացակարգերի պարզեցմանն ուղղված փոխադարձ հետաքրքրություն ներկայացնող մի շարք հարցեր։ Համաձայնություն է  ձեռք բերվել  շարունակել աշխատանքային քննարկումները և խորացնել համագործակցությանն ուղղված ջանքերը։ 

ՀՀ տարածքային կառավարման և զարգացման նախարարություն