Ջոն Կիրակոսյանի անվան դպրոցում առաջին դասարանի տղային տարել են զուգարան, ծեծել ու կտրել թարթիչները

Այսօր՝ նոյեմբերի 13-ին, Հունաստանի և Հայաստանի քաղաքացի` 47-ամյա Մարինե Սարգսյանը պատրաստվում է դիմել ՀՀ ոստիկանության պետ, ոստիկանության գեներալ–գնդապետ Վլադիմիր Գասպարյանին, կրթության և գիտության նախարար Լևոն Մկրտչյանին, Երևանի քաղաքապետ Տարոն Մարգարյանին, որպեսզի նրանք իրենց հսկողության տակ վերցնեն նոյեմբերի 8-ին Երևանի կենտրոն վարչական շրջանի Ջոն Կիրակոսյանի անվան դպրոցում իր տղայի՝ Հունաստանի քաղաքացի` 7-ամյա Մարիոս–Արտյոմ Սարգսյանի նկատմամբ դպրոցում կատարված անմարդկային վերաբերմունքի բացահայտման գործը: Այս մասին տեղեկանում ենք Shamshyan.com-ից:

Երեխայի մայրն ասել է, որ  պատրաստվում է դիմել Հայաստանում Հունաստանի դեսպանատուն: «Երեխայիս նկատմամբ նոյեմբերի 8-ին նշված դպրոցի զուգարանում իր դասընկերներ՝ Մինասը, Գոռը և Գագիկը բռնություն են կիրառել: Սկոտչով կապել են ձեռքերը ու դեմ են տվել պատին, մի քանի հարվածներ են հասցրել, ինչի հետքերը կան մարմնի և քթի վրա, այնուհետև նրանցից մեկն էլ մկրատով երեխայի թարթիչներն է կտրել: Տղաս առողջական խնդիրներ է ունեցել նախկինում և մեծ դժվարությամբ՝ թե՛ Ռուսաստանում, թե՛ Իսրայելում բուժումների ենք տարել: Որոշ չափով ապաքինվել էր, գրեթե չէր կակազում, սակայն այս դեպքից հետո երեխայի մոտ նորից սկսվել է վախի մթնոլորտն ու խոսելիս սկսել է նորից կակազել»,- ասել է կինը: