2018-ի բյուջեի նախագիծը իրատեսական ու կայունացման նախագիծ է. Շարմազանով

Այսօր տեղի ունեցավ ՀՀԿ ԳՄ հերթական նիստը, որի ավարտից հետո ՀՀԿ խոսնակ Էդուարդ Շարմազանովը նշեց, որ քննարկվել են ներկուսակցական, ներքաղաքական հարցեր, ՏԻՄ ընտրություններին ՀՀԿ-ի մասնակցության ընթացքը և այլն:Շարմազանովը նշեց, որ քննարկվել է կառավարության կողմից ԱԺ-ին ներկայացված բյուջե 2018-ի նախագիծը :

«Բյուջեի նախագիծը իրատեսական է, կայունացման բյուջե է և նպատակ ունի երկարաժամկետ աճ ապահովելու: 2018-ի բյուջեն նախատեսում է 4,5-5 տոկոս տնտեսական աճ, ներդրումների ավելացում: Դրական ենք գնահատում ԱԺ-ում տեղի ունեցած քննարկումները: Սա ռեալ բյուջե է»,- ասաց Շարմազանովը` հավելելով, որ լավ կլիներ, եթե ընդդիմադիր ուժերը` բյուջեն քննադատելուց զատ, ներկայացնեին նաև իրենց կողմից մշակած այլընտրանքային բյուջեի նախագծերը: