Բարոյական չէ` մեկնաբանեմ հոկտեմբերի 27-ի հետ կապված` սպարապետի եղբոր խոսքերը. Շարմազանով

ՀՀ ԱԺ փոխխոսնակ Էդուարդ Շարմազանովն ասյօր խորհրդարանում լրագրողների հետ զրույցում, պատասխանելով հարցին`  իշխանությունները չե՞ն ցանկանում` հոկտեմբերի 27-ը բացահայտվի, ասաց, որ ինքը մեկ բան գիտի, որ հոկտեմբերի 27-ն իրականացնողներն առնվազն ձերբակալված են:

«Ես չեմ կարող ասել, թե ովքե՞ր են պատվիրատուները, կա՞ն, թե՞ չկան, բայց կարող եմ ասել, որ հոկտեմբերի 27-ը մեր պետականության ամենաողբերգական էջերից մեկն է, և ՀՀ զարգացումն ակնհայտորեն հետ գցվեց, որովհետև թե' Վազգեն Սարգսյանը, թե' Կարեն Դեմիրճյանը, թե' մեր մյուս գործընկերները քաղաքական էլիտան էին, նրանց առաջնորդությամբ կարող էինք ունենալ շատ ավելի լավ երկիր»,- ասաց նա:

Շարմազանովը նաև ընդգծեց, որ այդ ժամանակ Վազգեն Սարգսյանը ՀՀԿ առաջնորդն էր, և կորցրել ենք ոչ միայն սպարապետին, այլև իրենց կուսակցությունը կորցրել է իր առաջնորդին:

Դիտարկմանը` Արամ Սարգսյանն ասում է, որ իշխանություններն են մեղավոր, նա արձագանքեց, որ չի մեկնաբանում Արամ Սարգսյանի խոսքերը: «Չեմ մեկնաբանում, որովհետև նա սպարապետի եղբայրն է, ունի իր պատճառներն ու զգացմունքները, և բարոյական էլ չէ, որ ես այսօր սպարապետի, Դեմիրճյանի ընտանիքի անդամներից որևիցե մեկի ասածները որոշեմ մեկնաբանել»,- հայտարարեց Շարմազանովը:

Հարցին էլ` խորհրդարանն ապահովագրվա՞ծ է հիմա նման միջադեպերից, պատասխանեց. «Ես միայն մեկ բան գիտեմ, որ այսօր ոչ ոք ոչ մի բանից ապահովագրված չէ, ամեն ինչ Աստծո ձեռքերում է»: