Չեխական զենքերն Ադրբեջանին Չեխիան չի վաճառել. Միլան Շտեխ

Չեխիայի Հանրապետության խորհրդարանի սենատի նախագահ Միլան Շտեխի պատվիրակությունը պաշտոնական այցով Հայաստանում է: Այսօր խորհրդարանում տեղի ունեցավ Միլան Շտեխի ասուլիսը:

Նա նշեց, որ ակնհայտ տեսնում են, որ Հայաստանում մարդու իրավունքների պաշտպանությունն ու ժողովրդավարությունը բարձր մակարդակի վրա են: «Մենք Հայաստանը դիտում ենք որպես ժողովրդավար երկիր, որտեղ ազատ, անկախ ընտրություններ են անցկացվում, որտեղ կա խոսքի ազատություն»,- ասաց Շտեխը։

Նա կարևորեց նաև այսօր հայ-չեխական բիզնես-ֆորումի բացումը՝ ընդգծելով, որ հայ-չեխական համագործակցությունը կարող է ծավալվել մի շարք ոլորտներում և նպաստել երկու երկրների տնտեսության զարգացմանը։ «Չեխիայի Հանրապետությունն ունի արագ և ընթացիկ զարգացող տնտեսություն։ Մի բան կարող եմ ասել, որ դուք կզարմանաք։ Չեխիայում գրեթե բոլորն ունեն աշխատանք։ Միայն 3 տոկոսն է, որ չունի աշխատանք, դրանք էլ այն մարդիկ են, ովքեր երբեք չեն ձգտել աշխատել։ Չեխիան շատ բարձր մակարդակի վրա է, և չեխ գործարարներն ամեն ինչ անելու են` հայ գործարարների հետ հարաբերություններ հաստատելու համար»,- նշեց Շտեխը:

Նա նաև հայտարարեց, որ չեխական զենքերն Ադրբեջանին Չեխիայի Հանրապետությունը չի վաճառել: «Չեխիայի Հանրապետությունը հարգում է այն էմբարգոն, որը դրված է այդպիսի վտանգավոր երկրների վրա, և չեմ հասկանում` ինչպես են չեխական զենքերը հասել Ադրբեջան, բայց հավաստիացնում եմ, որ Չեխիայի իշխանություններն ու կառավարությունը դրան համաձայնություն չեն տվել», - նշեց Շտեխը։