Ինչքան ես շատ գումար ունենամ, այդքան ժողովուրդը շատ կօգտվի. Վարդան Ղուկասյան

«Ծառուկյան» խմբակցության պատգամավոր Վարդան Ղուկասյանը տարօրինակ է համարում, որ Երևանում վարձով բնակարանի համար 100 հազար դրամ ԱԺ-ից փոխհատուցում ստանալու համար` իր ներկայացրած դիմումը քննարկումների տեղիք է տվել։ Նրա խոսքով` դեռ սեպտեմմերի 25-ին է դիմումը հետ վերցրել:

«Ես չեմ էլ կարող որևէ մեկին ասել, թե մարդիկ ինչու են դիմում ներկայացրել, որ այդ 100 հազար դրամները ստանան: Դա օրենքով ամրագրված է, իրենց իրավասությունն է»,- ասաց նա, ապա հավելեց. «Հետո` ինչքան ես շատ գումար ունենամ, այդքան ժողովուրդը շատ կօգտվի, դուք էդքան մի' խառնվեք»:

Դիտարկմանը` ինչո՞ւ որոշեց հետ վերցնել դիմումը, պատգամավորը պատասխանեց. «Որ ձեզ տամ, որ այդ գումարը վերցնեք, հարստանաք, ճոխանաք»։ Նշենք, որ Ղուկասյանը պատկառելի ունեցվածքի տեր է:

Հարցին` ճի՞շտ է, որ «Ծառուկյան» խմբակցության ղեկավար Գագիկ Ծառուկյան է նկատողություն արել իր խմբակցության պատգամավորներին` 100 հազար դրամ փոխհատուցում ստանալու դիմումի համար, Վարդան Ղուկասյանը պատասխանեց. «Նմանատիպ հարցերն այնքան ցածր են, որ այդ հարցերը չեն քննարկվում «Ծառուկյան» խմբակցության մեջ: Ես զարմանում եմ, թե դուք ինչի եք խառնվել: Ես ամոթ էլ եմ զգում սրա մասին մեկնաբանություն տալ»:

Պատգամավորը շեշտեց՝ իրենք անգամ չեն հասցրել ստանալ 100 հազար դրամ փոխհատուցումը, միևնույն ժամանակ նշեց, որ վատ չէր զգա, անգամ եթե ստացած լիներ: