Ոստիկանությունն ուժեղացված հսկողություն է սահմանել Ալավերդու Վահագնի և նրա մտերիմների նկատմամբ. «Ժողովուրդ»

«Ժողովուրդ» թերթը գրում է. «Երևանի կենտրոնում՝ Վերնիսաժի հարակից տարածքում, սեպտեմբերի 14-ին հնչած կրակոցներից հետո ոստիկանությունն ուժեղացված հսկողություն է սահմանել տուժողներից Ալավերդիում քրեական հեղինակություն համարվող Վահագն Աբգարյանի և նրա մտերիմների նկատմամբ:

Հիշեցնենք, որ այդ կրակոցների արդյունքում սպանվել էր Գագիկ Մոսինյանը, իսկ Վահագն Աբգարյանը մարմնական վնասվածքով տեղափոխվել էր հիվանդանոց: Հնչած կրակոցները Ալավերդի քաղաքում գործող երկու հանցավոր խմբավորման միջև տարիներ շարունակ լարվածության դրսևորում էր. մի կողմում Վ. Աբգարյանն է, մյուս կողմում՝ նրա հեռավոր ազգական Տարոն Աբգարյանը, որի թիմի անդամներին՝ Ալբերտ Բլբուլյանին և Արմեն Կարադավիդովին, մեղադրանք է առաջադրվել կրակոցների համար. այժմ նրանք գտնվում են հետախուզման մեջ:

«Ժողովուրդ» օրաթերթին հայտնի դարձավ, որ Վ. Աբգարյանը Երևան է եկել միջադեպից մեկ օր առաջ, հանդիպումներ ունեցել, իսկ հաջորդ օրն էլ տեղի են ունեցել կրակոցները. և նա չի բացառել, որ տեղի ունեցածն այդ հանդիպման հետևանք է»:

Նյութն ամբողջությամբ կարդացեք թերթի այսօրվա համարում: