Ինքնասպանության փորձ կատարած 13-ամյա տղան սկսել է ինքնուրույն շնչել

Տեղեկացրել էինք, որ Արմավիրում սեպտեմբերի 12-ին արտակարգ դեպք էր տեղի ունեցել. 13-ամյա դեռահասն իրենց այգում հակի թելով կախվելու միջոցով փորձել էր ինքնասպանություն գործել, բարեբախտաբար, նրան ժամանակին հայտնաբերել էր եղբայրը։ Անչափահասին անմիջապես տեղափոխել էին «Արմավիր» ԲԿ, որտեղից էլ` Երևանի «Սուրբ Աստվածամայր» ԲԿ:

«Սուրբ Աստվածամայր» ԲԿ-ի տնօրեն Նիկոլայ Դալլաքյանը Yerkir.am-ի հետ զրույցում հայտնեց, որ տղայի առողջական վիճակում որոշակի դրական դինամիկա կա: «Տղային անջատել ենք արհեստական շնչառական սարքից, նա արդեն ինքնուրույն է շնչում»,-ասաց Դալլաքյանը:

Հիշեցնենք, որ տղան կոմայի մեջ էր:

Դպրոցի տնօրենն էլ, որտեղ սովորում է տղան, Yerkir.am-ի հետ զրույցում նշել էր, որ  Նարեկն այդ օրը գնացել է դասի, բոլոր դասերին ներկա եղել: Այդ օրն էլ իրեն սովորականի պես է պահել:  «Դասերից չի բացակայել, վարքի մեջ էլ ոչ մի տարօրինակ բան չի ունեցել: Մի քիչ անհանգիստ է, շարժունակ: Ընտանիքը սոցիալապես անապահով չէ. հայրն աշխատում է մեզ մոտ` ջրային կոմիտեում, իսկ մայրը դասարանի ծնողխորհրդի նախագահ է: Շատ հետևողական ծնողներ ունի Նարեկը, երկուսն էլ իմ աշակերտներն են եղել: Բոլորս ուղղակի ապշած ենք նրա քայլի համար»,- ասել էր դպրոցի տնօրենը: