Այս անգամ մրցակիցս շատ ուժեղ էր. Նարեկ Աբգարյան

«Պրոֆեսիոնալ բռնցքամարտում 5–րդ մենամարտն անցկացրեցի: Այս անգամ մրցակիցս շատ ուժեղ և ֆիզիկապես լավ պատրաստված էր, սակայն ես ավելի արագ ու սառնասիրտ գտնվեցի, և ինձանից ընդամենը 5 ռաունդ պահանջվեց մրցամարտի ելքը վճռելու համար: Սա ինձ համար 2-րդ մենամարտն էր, որը բաղկացած էր 8 ռաունդից: Մի փոքր հանգստանալուց հետո կսկսեմ նախապատրաստվել հաջորդ մենամարտին»,- ասաց բռնցքամարտիկը:

Խոսելով հավաքականում իր ելույթների մասին` Աբգարյանն ասաց. «Խարկովում տեղի ունեցած Եվրոպայի առաջնությունից հետո հասկացա, որ պրոֆեսիոնալ բռնցքամարտը խանգարում է սիրողականին: Եթե մարզվում ես պրոֆեսիոնալ բռնցքամարտին համապատասխան, ապա չես կարող լավ ելույթ ունենալ սիրողական բռնցքամարտում, և հակառակը: Դրանք երկու տարբեր աշխարհ են: Եվրոպայի առաջնությունից հետո որոշեցի այլևս հանդես չգալ սիրողական բռնցքամարտում, հնարավոր է փոխեմ որոշումս միայն օլիմպիական խաղերին մասնակցելու համար»:

Նշենք, որ հաջորդ մենամարտը Նարեկ Աբգարյանը կանցկացնի սեպտեմբերի 29-ին Իսպանիայի Բիլբաո քաղաքում: