Եթե ճակատագիրը տնօրինի, պետք է ծառայեմ. Միքայել եպիսկոպոսը՝ Պոլսո Աթոռում իր` հավանական թեկնածության մասին

Այս օրերին Հայաստանում է գտնվում Պոլսո Հայոց պատրիարքական տեղապահ Գարեգին արք. Բեքչյանը: Այս մասին տեղեկանում ենք «Հայ ձայն» պարբերականից: Պարբերականի հետ զրույցում արք. Բեքչյանը նշել է, որ Պոլսո Աթոռում սպասվող պատրիարքական ընտրությունների հավանական թեկնածուների շարքում է Շիրակի թեմի առաջնորդ Միքայել եպիսկոպոս Աջապահյանը, ինչպես նաև Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանը:

Yerkir.am-ը զրուցեց Միքայել եպիսկոպոս Աջապահյանի հետ` ցանկանալով տեղեկանալ, թե սրբազանն ունի նման ցանկություն` ծառայության անցնել Պոլսո Աթոռում: Սրբազանը նշեց, որ ինքը` որպես հոգևորական, ուխտել է ծառայել ցանկացած հանգամանքում և ցանկացած տեղում: «Այնպես որ` եթե ճանակագիրն այդպես տնօրինի, պետք է ծառայեմ: Բայց մասնավոր, բնականաբար, նման մեծ խանդավառություն չունեմ»,-ասաց սրբազանը:

Հարցին, թե որքանո՞վ է ծանոթ Պոլսո հայ համայնքի խնդիրներին և համայնքի վերաբերյալ այլ հարցերին՝ սրբազանը պատասխանեց, որ չի կարող ասել` ամբողջությամբ ծանոթ է, սակայն ինչ-ինչ ինֆորմացիայի տիրապետում է.«Բավարար ծանոթ եմ տեղի համայնքի խնդիրներին: Բացի այդ` իմ հայրը ծնունդով թուրքահպատակ էր, ինչն ինձ իրավունք է տալիս թեկնածու լինել: Պատրաստ եմ հայ եկեղեցու ասպարեզում ցանկացած պատասխանատվություն ստանձնելու, եթե այն տրված կլինի ինձ»:

Ի դեպ, ընտրությունները նախատեսվում են անցկացնել այս տարվա դեկտեմբեր ամսին: