Երեւանում խմելու ջուրը կէժանանա

«Երևան Ջուր» ընկերությունը դիմել է Հանրային ծառայությունները կարգավորող հանձնաժողովին` առաջարկելով ջրի սակագինը նվազեցնել 8 դրամով:

Այսինքն` ներկայումս գործող` 1 խմ ջրի համար սահմանված 174.059 դրամ սակագինը, ըստ «Երևան Ջուր» ընկերության առաջարկի, պետք է դառնա 166.044 դրամ` 1 խմ-ի համար: Սակայն հանձնաժողովը մտադիր է այլ` ավելի ցածր սակագին սահմանել:

Այս հարցի առնչությամբ Հանրային ծառայությունները կարգավորող հանձնաժողովի պաշտոնական կայքում տեղադրված որոշման նախագծից տեղեկանում ենք, որ հանձնաժողովն առաջարկում է սահմանել`

1) սպառողներին խմելու ջրի մատակարարման ծառայության մատուցման սակագինը` 120.598 դրամ` մատակարարված յուրաքանչյուր խորանարդ մետր խմելու ջրի դիմաց` առանց ավելացված արժեքի հարկի և 144.718 դրամ` ներառյալ ավելացված արժեքի հարկը.

2) սպառողներին ջրահեռացման ծառայության մատուցման սակագինը` 9.932 դրամ` մատակարարված յուրաքանչյուր խորանարդ մետր խմելու ջրի դիմաց` առանց ավելացված արժեքի հարկի և 11.918 դրամ` ներառյալ ավելացված արժեքի հարկը.

3) սպառողներին կեղտաջրերի մաքրման ծառայության մատուցման սակագինը` 11.350 դրամ` մատակարարված յուրաքանչյուր խորանարդ մետր խմելու ջրի դիմաց` առանց ավելացված արժեքի հարկի և 13.620 դրամ` ներառյալ ավելացված արժեքի հարկը.

4) ջրային համակարգի օգտագործման թույլտվություն ունեցող այլ անձանց կամ համայնքներին`

ա. խմելու ջրի մատակարարման մեծածախ ծառայության մատուցման սակագինը` 14.188 դրամ` մատակարարված յուրաքանչյուր խորանարդ մետր խմելու ջրի դիմաց` առանց ավելացված արժեքի հարկի և 17.026 դրամ` ներառյալ ավելացված արժեքի հարկը.

բ. ջրահեռացման մեծածախ ծառայության մատուցման սակագինը` 28.854 դրամ` յուրաքանչյուր խորանարդ մետր հեռացվող ջրի դիմաց` առանց ավելացված արժեքի հարկի և 34.625 դրամ` ներառյալ ավելացված արժեքի հարկը:

Հիշեցնենք, որ, ըստ Հանրային ծառայությունները կարգավորող հանձնաժողովի կողմից 2006 թվականի մայիսին «Երևան Ջուր» ընկերությանը տրված լիցենզիայի, ինչպես նաեւ` «Երևան Ջուր» ընկերությունը 10 տարով ֆրանսիական Veolia Woter ընկերությանը վարձակալության հանձնելու պայմանագրի, սահմանված էր, որ 2012 թ. Երևանում 1 խմ ջուրը պետք է արժենար ընդամենը 99 դրամ, իսկ վարձակալության վերջին տարում` 2015 թ.` իջներ մինչև 75 դրամի:

Հանրային ծառայությունները կարգավորող հանձնաժողովում «Երեւան Ջուր» ընկերության կողմից մատուցվող ծառայությունների սակագները փոփոխելու համար նախատեսված նիստը, ըստ օրակարգի, կգումարվի հունիսի 21-ին: