Երբ երիտասարդները զոհվում են խաղաղ ժամանակներում, խոսքն ուղղակի սպանության մասին է.Արա Բաբլոյան

Հունիսի 14-ին Տաջիկստանի Հանրապետության նախագահ Էմոմալի Ռահմոնն այցելել է ՀՀ Ազգային ժողով :

Հանդիպմանը ներկա են եղել խորհրդարանական խմբակցությունների ղեկավարներ եւ ներկայացուցիչներ:

Ողջունելով Տաջիկստանի Հանրապետության նախագահին Ազգային ժողովում՝ Արա Բաբլոյանը նշել է, որ ուրախ է խորհրդարանում հյուրընկալելու բարեկամ Տաջիկստանի նախագահին հայ-տաջիկական դիվանագիտական հարաբերությունների հաստատման 25-ամյակի շրջանակում:

ՀՀ ԱԺ նախագահը փաստել է, որ այսօր հայ-տաջիկական հարբերությունները զարգանում են բոլոր ուղղություններով եւ, Հայաստանը շահագրգիռ է խորացնելու դրանք՝ ելնելով երկու երկրների հետաքրքրություններից եւ շահերից:

Արա Բաբլոյանը կարեւորել է խորհրդարանական դիվանագիտության եւ բարեկամական խմբերի դերը երկկողմ հարաբերությունների հաստատման եւ խորացման գործում:

ՀՀ ԱԺ նախագահը կարեւորել է Տաջիկստանի իշխանությունների եւ ժողովրդի վերաբերմունքն իրենց երկրում ապրող հայկական համայնքի նկատմամբ:

Արա Բաբլոյանը բարձր է գնահատել Տաջիկստանի նախագահի՝ իր երկրի առջեւ ծառացած խնդիրները խաղաղ ճանապարհով լուծելու մոտեցումն ու հույս հայտնել, որ հայ-տաջիկական բարեկամական հարաբերություններն իրենց ազդեցությունը կունենան նաեւ ԼՂ հիմնախնդրի հարցում, եւ տեսակետները համահունչ կլինեն ԵԱՀԿ Մինսկի խմբի համանախագահ երկրների տեսակետին:

Այս համատեքստում Արա Բաբլոյանը ցավով նշել է. «Այլ բան է, երբ զինվորը զոհվում է պատերազմի ժամանակ՝ մարտի դաշտում: Իսկ երբ երիտասարդները զոհվում են խաղաղ ժամանակներում, խոսքն ուղղակի սպանության մասին է»:

 Տաջիկստանի Հանրապետության նախագահ Էմոմալի Ռահմոնը շնորհավորել է Արա Բաբլոյանին ՀՀ Ազգային ժողովի նախագահ ընտրվելու առթիվ եւ մաղթել արգասաբեր աշխատանք:

Տաջիկստանի նախագահը նշել է, որ անկախության հաստատումից ի վեր երկու երկրների հարբերությունները վերելք են ապրել, եւ այսօր կան բոլոր պայմանները դրանք խորացնելու համար:

Էմոմալի Ռահմոնի խոսքով՝ երկու երկրների քաղաքական երկխոսությունը գտնվում է բարձր մակարդակի վրա, իսկ համագործակցությունը զարգանում է կրթության, գիտության, առողջապահության, տնտեսության եւ մշակույթի բնագավառներում:

Խոսելով աշխարհաքաղաքական վերջին զարգացումների եւ տարածաշրջանում տիրող իրավիճակի մասին՝ Էմոմալի Ռահմոնը նշել է, որ Տաջիկստանը գտնվում է վտանգավոր գոտում, եւ տաջիկ ժողովուրդը լավ գիտե խաղաղության գինը: Անդրադառնալով ԼՂ հակամարտության կարգավորմանը՝ Տաջիկստանի նախագահը նշել է, որ խաղաղ կարգավորման շուրջ տարվող բանակցությունները հակամարտության լուծման միակ ճանապարհն են:

Տաջիկստանի նախագահը փաստել է, որ մեր երկրները պիտի խորացնեն համագործակցությունը բոլոր հնարավոր ոլորտներում եւ միասին հաղթահարեն ժամանակի մարտահրավերները:

Այնուհետեւ Տաջիկստանի նախագահը գրառում է կատարել ՀՀ Ազգային ժողովի պատվավոր հյուրերի մատյանում:

Հանդիպման ավարտին Էմոմալի Ռահմոնը խորհրդարանական պատվիրակություն է հրավիրել Տաջիկստան:

Հրավերը սիրով ընդունվել է: