«Կեղծ դիտորդը» վստահեցնում է՝ պաշտոնը վաստակել է երկարամյա մանկավարժական գործունեություն համար

Երևանի քաղաքապետարանի հանրակրթության վարչության նորանշանակ պետ Աննա Ստեփանյանն այսօր Քաղաքային պանթեոնում լրագրողներին վստահեցրեց, որ ինքը «կեղծ դիտորդ» չի եղել:

Նշենք, որ Աննա Ստեփանյանը Երևանի ավագանու ընտրությունների օրը Երևանի ընտրատեղամասերից մեկում հանդես էր եկել որպես դիտորդ «Կրթություն և մշակույթ» կազմակերպության կողմից։ «Ես այդ հարցին անդրադարձել եմ, 25 տարվա մանկավարժական գործունեության համար եմ նշանակվել»,- ասաց նա՝ արձագանքելով հարցին, թե ՀՀԿ-ին ծառայելու համա՞ր է նշանակվել այդ պաշտոնում:

Երևանի քաղաքապետ Տարոն Մարգարյանն էլ լրագրողների հետ զրույցում չհամաձայնեց կարծիքին,  թե Աննա Ստեփանյանը կեղծ դիտորդ է։ «Ես այդ կարծիքին չեմ, նա վերջին ութ տարիներին եղել է դպրոցի տնօրեն, և եթե ութ տարի առաջ հիշենք այդ դպրոցի կարգավիճակն ու այսօր, համեմատություն կանենք»,- ասաց նա:

Հարցին, թե ո՞ր արժանիքի համար է Աննա Ստեփանյանին նշանակել այդ պաշտոնին, Տարոն Մարգարյանը պատասխանեց. «Այս ութ տարիների ընթացքում, որ նա աշխատել է դպրոցում, այնտեղի աշակերտների ծնողներից կլսեք արժանիքների մասին»։