Գյուղը զրկվել էր տրանսպորտային միջոցից. հարցին ժամանակավոր լուծում է տրվել

Հայտնել էինք, որ Արարատի մարզի Նորաբաց համայնքը սպասարկող 54 համարի երթուղային ավտոբուսը մայիսի 17-ից համայնք չի մտնում ճանապարհների անմխիթար վիճակի պատճառով:

Մայիսի 23-ին համայնքի բնակիչները փակել էին դեպի Երևան տանող գլխավոր ճանապարհը, ինչից հետո նրանց խոստացել էին, որ երթուղայինը կրկին գյուղով կանցնի:

Yerkir.am-ի հետ զրույցում Նորաբացի համայնքապետ Գալուստ Գալստյանը հայտնեց, որ երեկ կեսօրվանից արդեն երթուղայինը մտնում է գյուղ: Համայնքապետի խոսքով` պայմանավորվածություն է ձեռք բերվել երթուղայինը սպասարկող ընկերության ղեկավարության հետ:

«Մյուս շաբաթվա մեջ արդեն ասֆալտապատումը կսկսենք, բայց ամբողջ ասֆալտը չէ, խոսքը գնում է  միայն փոսային հատվածները լցնելու մասին»,- ասաց Գալստյանը` հավելելով, որ փոսալցման աշխատանքները համայնքի միջոցներով են արվելու:

«Մեր բոլոր հնարավորությունները կենտրոնացնում ենք համայնքի այդ ամենակարևոր խնդիրը լուծելու համար: Այնպես չէ, որ մեր խնդիրներից միայն ասֆալտապատումն էր, գումարն էլ կար, ու մենք այդ խնդիրը չէինք լուծում: Գումարը նախատեսված էր այլ բանի համար, բայց հասկացանք, որ բնակչությունը սա ավելի է կարևորում: Փորձում ենք մեր բոլոր հնարավորություններով այս հարցին լուծում տալ»,- ընդգծեց նա:

Երթուղայինի վարորդներից մեկն էլ մեզ հետ զրույցում նշեց, որ հիմա գյուղով անցնում են, բայց եթե շաբաթվա մեջ ճանապարհները չբարեկարգվեն, դարձյալ չեն մտնի գյուղ:

Ինչևէ, շուրջ երկու շաբաթ համայնքը տրանսպորտային միջոցից զրկված էր, սակայն հարցին կրկին տրվեց ժամանակավոր լուծում: