Դավթաշենի կամրջից ընկած 13-ամյա տղան այկիկենդո կարատեի Հայաստանի բազմակի չեմպիոն էր. լուսանկարներ

Երեկ Երեւան քաղաքի Դավթաշենի կամրջից ընկնելու հետևանքով մահացած` 13-ամյա տղան կարատեիստ էր, Հայաստանի այկիկենդո ֆեդերացիայի սան:

Yerkir.am-ի հետ զրույցում ֆեդերացիայի նախագահ Դավիթ Աթանեսյանը հայտնեց, որ իր սանին որդու պես է վերաբերվել, նա իր լավագույն սաներից էր, 3 տարեկանից հաճախել է կարատեի և այդ մարզաձևում բազմաթիվ հաջողություններ արձանագրել:

Նրա խոսքով՝ Համլետը 12 անգամ Հայաստանի բացարձակ չեմպիոն է եղել, Եվրոպայի արծաթե մեդալակիր, աշխարհի առաջնության 4-րդ մրցանակակիր: «Նա ֆեդերացիայի դեմքն էր: Եթե ինչ-որ տեղ պետք է ներկայացնեինք Հայաստանը, նրանով էինք ներկայանում: Այդպես նրան 10 տարի պատրաստել ենք»,- ասաց ֆեդերացիայի նախագահն ու հավելեց. «Մեկը չկար, որ նրան չսիրեր, շատ մարդասեր, ընկերասեր, շատ լավ երեխա էր»:

Աթանեսյանի խոսքով՝ այկիկենդոյի աշխարհում գործող տարբեր ֆեդերացիաներից արդեն զանգահարել և ցավակցել են, քանի որ միջազգային մրցաշարերից ճանաչել են մարզիկին:

ՀՀ քննչական կոմիտեի տարածած հաղորդագրության համաձայն` նախնական տվյալներով՝ 13-ամյա երեխան մայիսի 25-ին՝ ժամը 18:30-ի սահմաններում, կամրջի երկաթյա արգելափակոցների վրայով քայլելիս հանկարծակի վայր է ընկել և մահացել: Նշանակվել է դատաբժշկական փորձաքննություն:

Մեր տեղեկություններով՝ տղան այդ օրը բակի տղաների հետ է եղել, և նախկինում էլ այդ խմբով նման հնարքներ են կատարել: Դեպքի պահին տարածքում ծառայություն իրականացնող ոստիկանները կամրջի մոտ չեն եղել:

 Լուսանկարը՝ Դավիթ Աթանեսյանի ֆեյսբուքյան էջից: