Ներողություն, մնացած` քաղաքական գործունեություն ծավալող մարդիկ մորուց ըտե՞նց են ծնվել. Դավիթ Մանուկյան

Ծառուկյան» դաշինքից պատգամավոր ընտրված Դավիթ Մանուկյանը, ով Ուկրաինայում ՀՀ դեսպան Անդրանիկ Մանուկյանի որդին է, այսօր խորհրդարանում լրագրողների դիտարկմանը, թե Հայաստանում սերնդեսերունդ է իշխանությունը փոխանցվում, ասաց. «Ինձ ոչ թե նշանակել են, այլ ընտրվել եմ 21 000 քաղաքացու կողմից: Ես չգիտեմ՝ ում ինչ է փոխանցվել»:

Հարցին՝ ո՞ր արժանիքի համար են ընտրել Ձեզ, պատասխանեց. «Էդ հարցը պետք է ուղղել բնակիչներին, պետք է հարցում կատարել, այդ հարցին կարող են պատասխանել Կոտայքի մարզի բնակիչները»:

«Հնարավոր է կաշառքի միջոցո՞վ են այդ ձայները գոյացել» հարցին էլ Մանուկյանը պատասխանեց. «Չկա նման բան, բացառվում է»:

Նորընտիր պատգամավորը նաև ասաց, որ իր աշխատանքը հենց խորհրդարանում էր պատկերացնում:

Դիտարկմանը՝ բայց Դուք քաղաքական գործունեություն  չեք ծավալել նախկինում, այսպես արձագանքեց. «Իսկ ներողություն, մնացած` քաղաքական գործունեություն ծավալող մարդիկ մորուց ըտե՞նց են ծնվել: Աստիճանաբար դարձել են: Ես էլի եմ ասում` ինձ ՀՀ 21 հազար քաղաքացի ձայն է տվել»:

«Ձեր անունը հաշվի առնելո՞վ են ընտրել Ձեզ, թե՞ Ձեր հայրիկի» հարցին Մանուկյանը պատասխանեց. «Ես, իհարկե, հպարտանում եմ իմ հայրիկով, նրա անցած ճանապարհով, բայց Կոտայքի մարզի բնակիչներն ընտրել են Դավիթ Մանուկյանին»: