Լապշինի կինը հայտնել է, որ ամուսնու առողջական վիճակը վատացել է

Բաքվում կալանքի տակ գտնվող բլոգեր Ալեքսանդր Լապշինի կինը՝ Եկատերինա Լապշինան, Facebook-ում հայտնել է, որ Լապշինի առողջական վիճակը սկսել է վատանալ:

«Մարտի 17-ին Սաշան բողոքել է, որ իր առողջական վիճակը վատացել է, ես գրել եմ այդ մասին: Երեկվա խոսակցությունից հետո նրա վիճակը լուրջ մտավախություն է առաջացրել: Բացի գլխացավից, որը վերջին մի քանի օրերին նրա անբաժան «ուղեկիցն է», երեկ գիշեր հանկարծակի արյունահոսություն է սկսվել քթից»,- գրել է նա:

Եկատերինայի խոսքերով` մեկուսարանի բժիշկն ասել է, որ նրա հետ ամեն ինչ կարգին է, սակայն ինքը շարունակում է անհանգստանալ:

Կինը հավելել է, որ դիմել է հյուպատոսություն, Կարմիր խաչին և չի կասկածում, որ նրանք կաջակցեն, որպեսզի ամուսնուն բժշկական օգնություն տրամադրվի: