Առևտրային հարաբերությունները` ՌԴ-ում Հայաստանի նորանշանակ դեսպանի թիրախում

Ներքին անձնագրերով Հայաստան է այցելել մի քանի հազար ռուսաստանցի, սակայն  վիճակագրական պատկերը պարզ չէ` հաշվի առնելով փաստը, որ համաձայնագիրը կարճ ժամանակ առաջ է ստորագրվել. լրագրողներին հայտնեց ՌԴ-ում Հայաստանի արտակարգ և լիազոր դեսպան Վարդան Տողանյանը` խոսելով Հայաստանի և Ռուսաստանի միջև կնքված համաձայնագրի մասին, ըստ որի՝ օտարերկրացիներին հնարավորություն է տրվում  ՀՀ տարածք մուտք գործել ներքին անձնագրերով:

Դեսպանը նշեց նաև, որ ՀՀ կառավարության այդ որոշումը կնպաստի տուրիզմի զարգացմանը, սակայն մենք պետք է նաև տուրիստական երթուղիներ մշակենք, օրինակ` լեռնադահուկային սպորտը զարգացնենք:

Խոսելով Ռուսաստանում գլխավոր հյուպատոսությունների թվաքանակի ավելացման մասին` Տողանյանը նշեց, որ Հայաստանն առայժմ մտադիր չէ դրանք ավելացնել: Նա տեղեկացրեց, որ այժմ ՌԴ-ում Հայաստանի 4 գլխավոր հյուպատոսություն է գործում` Մոսկվայում, Դոնի Ռոստովում, Սանկտ Պետերբուրգում և Սոչիում: Դեսպանի խոսքով` այլ տարածքների ու շրջանների ընդգրկման խնդիր կա: «Այս առումով` ես պատրաստվում եմ ակտիվ շրջագայել ՌԴ-ով մեկ, քանի որ կան քաղաքներ, որտեղ մենք լավ չենք ներկայացված, սակայն կան հիմքեր` այդ շրջաններում համագործակցության կամուրջ գցելու»,- ասաց Տողանյանը:

Բացի այդ` դեսպանատան գործունեության մեկ այլ կարևոր ուղղություն է լինելու Հայաստանում ներդրումային ծրագրերի ընդլայնումը: Դեսպանի հավաստմամբ` Հայաստանի նախագահի այցի ընթացքում արդեն իսկ համաձայնագիր է ստորագրվել ներդրումային հիմնադրամի ստեղծման մասին։  «Դեսպանատունն էլ, իր հերթին, ակտիվ համագործակցում է Ռուսաստանի գյուղատնտեսության և էկոնոմիկայի նախարարությունների հետ` բիզնես ծրագրեր ստեղծելու մտահղացումներ կան: Այս տարվա ընթացքում արդեն իսկ որոշ ծրագրեր կյանքի կկոչվեն»,- ասաց Տողանյանը` հավելելով, որ առևտրա-արդյունաբերական ոլորտին առանձնահատուկ ուշադրություն են հատկացնելու: