Իրաքյան զորքերը ԻՊ-ից ետ են վերցրել Թուրքիայի հյուպատոսարանի շենքը

Իրաքի զինուժը Մոսուլ քաղաքում  «Իսլամական պետություն»  (ԻՊ) ահաբեկչական կազմակերպությունից ետ է վերցրել Թուրքիայի հյուպատոսարանի շենքը: Ըստ թուրքական «Haberler» լրատվամիջոցի` շենքն ամբողջովին ավերված է. տեղեկացնում է Ermenihaber-ը:

Հիշեցնենք, որ 2014թ.  հունիսի 15-ին ԻՊ-ի ահաբեկիչները հարձակվել էին Մոսուլում գտնվող Թուրքիայի հյուպատոսարանի վրա և պատանդներ վերցրել: Հյուպատոսարանը ԻՊ-ի կողմից օգտագործվում էր որպես շտաբ: Այն նաև մի քանի անգամ հրթիռակոծվել էր ԻՊ-ի դեմ ձևավորված դաշնակից ուժերի կողմից:

Հյուպատոսարանի գրավման կապակցությամբ լուրը հաստատել է նաև Իրաքի ներքին գործերի նախարարությանն առընթեր արագ արձագանքման ուժերի խոսնակ Աբդուլեմիր ալ Մեհդավը: Նա տեղեկացրել է, որ օպերացիայի ընթացքում ոչնչացվել են մեծ թվով  ահաբեկիչներ:

Նշենք, որ Մոսուլի ազատագրման օպերացիան սկսվել էր  դեռևս հոկտեմբերի 17-ին: