Հայաստանում ժողովրդի կեսը դժգոհ է, կեսը` գոհ, գոհերն ուղղակի պատգամավոր են

Հայաստանում ժողովրդի կեսը դժգոհ է, մյուս կեսն էլ` գոհ, բայց խնդիրն այն է, որ այդ գոհ մարդիկ պատգամավոր են: Այսօր` լրագրողների հետ հանդիպման ժամանակ, նման կարծիք հայտնեց ռեժիսոր Նիկոլայ Ծատուրյանը:

Ըստ նրա` պատգամավորների թիվն այնքան շատ է մեզ մոտ, որ մեկ բնակչին մեկ պատգամավոր է բաժին հասնում: Ծատուրյանը կարծում է, որ մարդիկ ուզում են պատգամավոր դառնալ, որ գողանան ու անձեռնմխելի լինեն:

«Մեր պատգամավորների համար պետք է անընդհատ «Մկների ժողովը» կարդան. զանգ կախող չկա, բոլորը ճառ են ասում: ԱԺ-ն ինձ մանկապատանեկան խումբ է հիշեցնում, իսկ պատգամավորները լուրջ դեմքերով ապուշություններ են անում»,- ասաց Ծատուրյանը:

Խոսելով գալիք ընտրությունների մասին` նա նշեց, թե այնքան միամիտ չէ, որ հավատա` ամեն ինչ շատ լավ է լինելու, ո՛չ, նույնն է մնալու: «Հիմա արդեն մի հզոր բանակ զբաղված է` ընտրակաշառք բաժանելով, բայց, չնայած այս ամենին, չպետք է հուսահատվենք` հո ազգովի Անուշը /նկատի ունի` Թումանյանի «Անուշը»-խմբ./ չե՞նք, որ գնանք, քցվենք»,- ասաց Ծատուրյանը: