Ռուսական ռմբակոծիչներն ավիահարվածներ են հասցրել Սիրիայում ԻՊ-ի զինապահեստներին

Ռուսաստանի օդատիեզերական ուժերին պատկանող Տու-22Մ3 հեռահար ռմբակոծիչները խմբակային ավիահարված են հասցրել «Իսլամական պետություն» ահաբեկչական խմբավորման դիրքերին սիրիական Դեյր Էլ Զոր քաղաքում: Այս մասին հաղորդում է Gazeta.ru-ն` վկայակոչելով Ռուսաստանի պաշտպանության նախարարության մամուլի հաղորդագրությունը:

ՌԴ ՊՆ-ից հայտնել են, որ ավիահարվածներ են հասցվել փետրվարի 3-ին Ալ-Մայադին քաղաքի շրջանում: Նշվում է, որ ռմբակոծիչներն օդ են բարձրացել Ռուսաստանի տարածքից և անցել են Իրանի և Իրաքի օդային տարածքով: Խոցման թիրախ են դարձել ահաբեկիչների զինապահեստները:

Պաշտպանական գերատեսչությունից տեղեկացրել են, որ նշանառության տակ առնված բոոր նպատակակետերը խոցվել են:

Հիշեցնենք, որ հունվարի 30-ին ՌԴ ուժերին պատկանող Տու-22Մ3 մակնիշի 6 ռմբակոծիչներ ավիահարվածներ էին հասցրել ԻՊ-ի դիրքերին Դեյր Էլ Զորում: