ԱՄՆ-ն ընդլայնել է Իրանի նկատմամբ ոչ միջուկային պատժամիջոցների ցուցակը

Միացյալ Նահանգներն ուրբաթ ընդլայնել է Իրանի նկատմամբ գործող ամերիկյան պատժամիջոցների ցուցակը` դրանում ներառելով 13 ֆիզիկական և 12 իրավաբանական անձանց:

Այս մասին հաղորդում է Reuters գործակալությունը`նշելով, որ այս որոշումը կայացվել է ԱՄՆ-ի կողմից Իրանին բալիստիկ հրթիռների փորձարկման պատճառով «նշանառության տակ առնելուց» օրեր անց:

ԱՄՆ գանձապետարանի կայքում հրապարակված հայտարարության մեջ նշվում են պատժամիջոցների տակ հայտնված անձանց անունները, որոնցից ոմանք գործում են Արաբական Միացյալ Էմիրություններում, Լիբանանում և Չինաստանում:

Ինչպես այսօր ավելի վաղ հաղորդել էինք, ԱՄՆ նախագահ Դոնալդ Թրամփը հայտարարել է, որ Իրանի նկատմամբ նույնքան «բարի» չի լինի, որքան իրեն նախորդած Բարաք Օբաման: