Պետական գաղտնիքի տիրապետող անձինք զրկվեցին լրացուցիչ վարձատրությունից

Կառավարության այսօրվա նիստում ֆինանսների նախարար Վարդան Արամյանը ներկայացրեց «Պետական և ծառայողական գաղտնիքի մասին» ՀՀ օրենքում փոփոխություն կատարելու մասին հարցը: Օրենքը նախատեսում էր, որ  պետական և ծառայողական գաղտնիք կազմող տեղեկությունների օգտագործմամբ աշխատանքներ կատարող քաղաքացիների և այդպիսի գաղտնիքի պաշտպանության կառուցվածքային ստորաբաժանումների աշխատակիցների համար սահմանված է լրացուցիչ վարձատրություն: Օրենքի փոփոխությամբ` առաջարկվում է հանել լրացուցիչ վարձատրության կետը:

Ըստ հանրապետական գործադիր մարմիններից ՀՀ ֆինանսների նախարարություն ներկայացված տեղեկատվության՝ պետական և ծառայողական գաղտնիք կազմող տեղեկությունների օգտագործման և պաշտպանության համար տրված հավելումների գումարը 2015 թվականին կազմել է 69.4 մլն դրամ, իսկ 2016 թվականի 1-ին կիսամյակում՝ 32 մլն դրամ: