Կայացել է միջգերատեսչական աշխատանքային խմբի հերթական նիստը

ՀՀ վարչապետի որոշմամբ ստեղծված` Դիլիջանում կրթական կլաստեր ստեղծելու միջգերատեսչական աշխատանքային խումբը գումարել է իր հերթական նիստը, որը վարել է աշխատանքային խմբի ղեկավար, ՀՀ  կրթության և գիտության նախարար Լևոն Մկրտչյանը: Քննարկմանը ներկա էին միջգերատեսչական խմբի անդամներ` ՀՀ մշակույթի, տարածքային կառավարման և զարգացման նախարարների տեղակալները, արդարադատության, սպորտի և երիտասարդության հարցերի, ՀՀ Նախագահի և ՀՀ վարչապետի աշխատակազմերի, ՀՀ կառավարությանն առընթեր պետական գույքի կառավարման վարչության և «Հայաստանի զարգացման նախաձեռնություններ» (IDeA) բարեգործական հիմնադրամի ներկայացուցիչներ: Հանդիպմանը մասնակցել է  նաև նախաձեռնության հեղինակ, UWC Dilijan քոլեջի կառավարիչների խորհրդի նախագահ, IDeA և  Scholae Mundi հիմնադրամների համահիմնադիր Վերոնիկա Զոնաբենդը:

Ողջունելով մասնակիցներին` ԿԳ նախարար Լևոն Մկրտչյանը նշել է, որ Հայաստանի կրթական համակարգում արդեն  լուրջ ներդրում ունեցող  IDeA հիմնադրամի հետ համատեղ  իրականացվող այս նախաձեռնությունը` Դիլիջանում կրթական  նոր կլաստերի հիմնադրումը, կլաստերների ձևավորման առաջին լուրջ փորձն է, որը կարող է օրինակելի նախադեպ նախատեսվող համալսարանական ցանցերի ստեղծման համար: Այդ առումով նախարարը կարևորել է կլաստերի ստեղծման իրավական հիմքերի, իրավակազմակերպական ձևի և կողմերի պարտավորությունների հստակեցման, ինչպես նաև ուսուցիչների վերապատրաստան հարցերը:  «Մեր խնդիրն է`  այս փուլում գործընթացը ճիշտ  հունի դնել, մշակել կոնկրետ մեթոդաբանություն, ապահովել իրավական  դաշտը, այնուհետև անցնել ծրագրի փորձնական մասի կազմակերպմանը»,-նշել է Լևոն Մկրտչյանը` ընդգծելով, որ այն կլինի բաց հարթակ` կրթական  նորագույն գաղափարների և նախաձեռնությունների համար, և կրթության ոլորտում ներդրում անել ցանկացողները կարող են մասնակցել դրան` նպաստելով  կրթական համակարգի զարգացմանը: Ներկայացնելով ծրագրի մանրամասները` UWC Dilijan քոլեջի կառավարիչների խորհրդի նախագահ IDeA-ի համահիմնադիր Վերոնիկա Զոնաբենդը նշել է, որ արդեն այս ծրագրով որոշակի ներդրողների և բարերարների կողմից մեծ հետաքրքրություն կա, և ներկայումս հիմնադրամի ներկայացուցիչներն աշխատում են նախագծի հիմնական մոտեցումների հստակեցման ուղղությամբ:
Քննարկման արդյունքում որոշվել է, որ  աշխատանքային խումբը կշարունակի ուսումնասիրել  կրթական կլաստերի ստեղծման իրավական հիմքերը և մյուս հանդիպմանը կներկայացնի համապատասխան հայեցակարգային դրույթները, հիմնական մոտեցումները և ճանապարհային հստակ քարտեզը` նախաձեռնությունը կյանքի կոչելու և այն ավելի առարկայական դարձնելու համար:

 ՀՀ ԿԳՆ