Արցախի ՈՒՀԱ թիմն արհամարհում է Բաքվի նյարդային ջղաձգումները

Ուրախների և հնարամիտների ակումբի արցախյան «Աղուհացով» թիմը հրավեր է ստացել ՈՒՀԱ  ակումբի նախագահ Ալեքսանդր Մասլյակովից` մասնակցելու Սոչիում հունվարի 10-23-ը անցկացվելիք 28-րդ միջազգային փառատոնին: Այս պահին խումբը գտնվում է Սոչիում և պատրաստվում է իր ելույթին:

Սակայն Բաքուն Մասլյակովի հրավերն անհանգստությամբ է ընդունել: «Ադրբեջանի նկատմամբ հերթական սադրանքն է կատարվել: Միլիոնավոր մարդկանց համար սիրելի դարձած ՈՒՀԱ-ն հայ անջատողականների ջանքերի շնորհիվ կրկին դառնում է քաղաքական սադրանքի տարր»,- գրել է ադրբեջանական vesti.az կայքը:

Արցախի ՈՒՀԱ ասոցիացիայի հիմնադիր Դավիթ Վանյանը Yerkir.am-ի հետ զրույցում ասաց, որ  սա առաջին հրավերը չէ Մասլյակովի կողմից, այլ երրորդը: Այսինքն` արդեն երրորդ տարին է, որ Ստեփանակերտի թիմը մասնակցում ՈՒՀԱ խաղերին: Դավիթ Վանյանի խոսքով` Ադրբեջանը միշտ է անհանգստացել այդ փաստից և բողոքի նամակներ ուղարկել ՈՒՀԱ ակումբի նախագահ Մասլյակովին` փորձելով խանգարել Արցախի թիմին` ելույթներ ունենալ: Սակայն Մասլյակովը միշտ էլ տվել է թույլտվություն` ասելով, որ ՈՒՀԱ-ն խաղ է, որը չի կարելի քաղաքականացնել:

Ըստ մեր զրուցակցի` այս փառատոնին մասնակցելուց հետո թիմը կարող է շատ հաջողություններ ունենալ, թեև մինչ հիմա էլ հաջող ելույթներ է ունեցել` հասնելով մինչև եզրափակիչ փուլ: Արցախի թիմը ներկայումս շատ լավ մարզավիճակում է և նպատակ ունի ընդլայնել թե' իր մասնակցությունը, թե' իր հաջողությունները, որովհետև աշխարհը կտեսնի աշխարհի կողմից չճանաչված պետության` Արցախի հումորի պոտենցիալը: Դավիթ Վանյանը հույս ունի, որ հայությունը սատար կկանգնի իրենց ՈՒՀԱ-ում հաջողությունների արձանագրման ճանապարհին: Իսկ ինչ վերաբերում է Բաքվի նյարդային արձագանքներին, ապա մեր զրուցակիցը նշեց. «Մենք ընդհանրապես նրանց ու նրանց նյարդային  արձագանքներին ուշադրություն չենք դարձնում»: