Մինչև տարեվերջ Երևան-Սևան մայրուղում կտեղադրվեն 1500 նոր ճանապարհային նշաններ

Այսօր տարեկան ամփոփիչ ասուլիսում տրանսպորտի, կապի և ՏՏ նախարար Վահան Մարտիրոսյանը, անդրադառնալով Հյուսիս-հարավ ճանապարհային միջանցքի շինարարությանը, նշեց, որ  աշխատանքները շարունակվում են բնականոն հունով:

Տրանշ 1-ի հետ կապված` արդեն ավարտվել և շահագործման են հանձնվել Երևան-Արտաշատ և Երևան-Աշտարակ հատվածներում անցած եռամսյակում 9 ուղեանցի և 1 կամրջի վերականգնման աշխատանքները:

Տրանշ 2-ի հետ կապված` Աշտարակ-Թալին ճանապարհահատվածում կատարվել են հողային, ճանապարհի լայնացման և 15 կմ շրջանցիկ հատվածի կառուցման աշխատանքներ: Եղանակային ոչ բավարար պայմանների պատճառով այս պահի դրությամբ դադարեցված են սեպտեմբերի 30-ին մեկնարկած` բետոնե ծածկի տեղադրման աշխատանքները:

Տրանշ 3-ի հետ կապված` Թալին-Լանջիկ-Գյումրի ճանապարհահատվածում կատարվել են հողային և ճանապարհային ծածկի լայնացման աշխատանքներ:

Տրանշ 4-ի հետ կապված մշակվել է  Սիսիանից Քաջարան ճանապարհահատվածի ներդրումային ծրագիրը: Նախատեսվում է ներգրավել մասնավոր ներդրողների:

Տրվել է Հայաստան-Վրաստան  սահմանին Բագրատաշենի կամրջի շինարարության ծրագրի մեկնարկը: Մեկնարկել է Վանաձոր-Ալավերդի-Վրաստանի սահման միջպետական ավտոճանապարհի վերականգնման և բարելավման ծրագիրը. կվերանորոգվի շուրջ 90 կմ երկարությամբ միջպետական ճանապարհը:

Ինչ վերաբերում է ավտոճանապարհների ընթացիկ պահպանմանն ու  սպասարկմանը, ապա մինչև տարեվերջ Երևան-Սևան մայրուղում կտեղադրվեն 1500 նոր ճանապարհային նշաններ: Վտանգավոր հատվածներում` Սարավան, Սիսիան, Ֆիոլետովո, ճանապարհների անվտանգությունը ապահովելու համար տեղադրվել են արգելափակոցներ:

Ավարտական փուլում է Նոր Հաճընի կամրջի լուսավորության ապահովումը: