Մենք չենք կարող Ռուսաստանում եղածը փոխել. նախարար

Այսօր տրանսպորտի, կապի և ՏՏ նախարար Վահան Մարտիրոսյանն իր տարեվերջյան ամփոփիչ ելույթում անդրադարձ կատարեց Լարսի խնդրին: Հիշեցնենք, որ ամեն տարի Վերին Լարս անցակետը, որ ռուս-վրացական սահմանին է, եղանակային վատ պայմանների պատճառով փակվում է, և ուղևորատար, բեռնատար մեքենաների կուտակումներ են առաջանում, դրանից էլ` տարբեր ածանցյալ խնդիրներ:

Նախարարը նշեց, որ Լարսի անցակետը Ռուսատանի հետ կապող միակ ցամաքային օղակն է: Նա վստահեցրեց, որ անհրաժեշտ աշխատանքներ կատարվում են, որ անցակետի հետ կապված խնդիրները վերանան:

«Մեր վրացի գործընկերներն անում են ամեն ինչ, որ այն անխափան աշխատի, բայց եղանակից էլ է շատ բան կախված: Ունեցանք աննախադեպ եղանակային պայմաններով ձմեռ: Այլընտրանքային ճանապարհների հարցը քննարկվում է, օրինակ` լաստանավով բեռների տեղափոխման հարցը, բայց հիմա Փոթիի նավահանգիստը լաստանավեր չի ընդունում, որովհետև փոթորիկ է: Մնում է ավիափոխադրման տարբերակը, որի մասին լրացուցիչ տեղեկատվություն կտրամադրվի»,- ասաց Մարտիրոսյանը:

Նա նշեց, որ այսօր Լարսի անցակետն արդեն բաց է: Հայաստանի սահմանին է արդեն մոտեցել 300 մեքենա, Լարսի սահմանը դեպի ՌԴ հատել է 240 մեքենա, 180 մեքենա էլ ուղևորվել է դեպի Հայաստան:

Հարց եղավ նաև բեռնափոխադրող և ուղևորափոխադրող վարորդների այն դժգոհությունների մասին, որ Ռուսաստանի սահմանը հատելուց հետո այնտեղի ճանապարհատրանսպորտային տեսուչները ապօրինի դրամ են բռնագանձում վարորդներից: Արդյո՞ք հնարավոր է հայկական կողմի միջամտությամբ այդ հարցը լուծել:

Նախարարը պատասխանեց, որ այդ հարցը բարձրացվել է: «Եղել եմ Լարսում, այդ հարցը բարձրացրել ռուս մաքսայինների ղեկավարի մոտ: Նրանք հավաստում են, որ նման բան չկա, մինչդեռ հայ վարորդները պնդում են, որ նման բաներ ժամանակ առ ժամանակ լինում են: Մենք, իհարկե, պայքարում ենք դրա դեմ, բայց հասկացեք` մենք չենք կարող այլ պետության` Ռուսաստանի ներսում որևէ բան փոխել»,- ասաց նախարարը: